Kiơ̆ tơbăt, tŏk mŭk drăm 9 khei kơ dêh char iŏk đei 8,22%, tim mă iok đei ƀlep trong tơlĕch ăn. Lơ̆m jăl IV, hơnih jang vei lăng ming man kăl tŏk 70,27%, hơnih jang kmăi kmŏk pơm tơlĕch tơmam drăm tŏk 25,24% vă pơklăp ăn oei ưh kơ tôm. Dêh char pơjao ăn Kơ iĕng Kơdră chĕp pơgơ̆r Hơnih vei lăng kon pơlei dêh char Trương Công Thái chiu pŭ hơnăp jang găh trong tơlĕch jang kon jên tơmơ̆t jang lơ̆m tơpôl 34.586 ti hlak jên, thuê̆ ăn hơnih mong jên bơ̆ jang 7.254 ti hlak jên; Kơ iĕng Kơdră chĕp pơgơ̆r Hơnih vei lăng kon pơlei Đào Mỹ iŏk vei lăng rim trong tơlĕch jang hơnih jang kmăi kmŏk pơm tơlĕch tơmam drăm, tĕch mơdro tơ̆ teh đak đe 765 triu USD păng sơng đei 1 triu 660.000 ‘nu tơmoi tơmang pơhiơ̆. Hăm tơring, phương, KPI akŏm lơ̆m thuê̆ tơmơ̆t, tơlĕch kon jên bơ̆ jang, tơlĕch kon jên tơmơ̆t jang păng tơdrong iŏk đei jơnei atŏk tơ iung mŭk drăm. Kơdră chĕp pơgơ̆r Hơnih vei lăng kon pơlei dêh char Đỗ Hữu Huy athei pơm hơdăh dôm trong tơlĕch jang, sơkơ̆t hơdăh bơngai chiu pŭ, tơdrong jang, tơmam drăm păng khei ‘năr jang keh đang, adoi chih tơbăt hơdăh jang keh đang rim khei vă tơtom hơmet pơ ‘lơ̆ng tơnap tap.