Hop akŏm đei pơgơ̆r kơtă, tơguăt hăm trư̆k truyê̆n truh 124 hơnih pơdah kơ xah, phương, tơring tơm. Dêh char Lâm Đồng dang ei đei hloh 621.000 hơdruh tơdăm, lơ̆m noh đei hloh 108.000 hơdruh tơdăm kon kông. Lơ̆m jơ pơma đam, 20 nơ̆r apinh, pơtruh đơ̆ng kang ƀô̆ Đoan, đoan viên, hơdruh tơdăm akŏm lơ̆m dôm tơdrong kăp gĭt nhen, tơgŭm jên iung pơm jang, tơroh hăm tơring tĕch răt, pơm tơlĕch jên đơ̆ng dôm tơdrong hơlen khua hŏk, sơkơ̆t hơdah pơtho tơdrong pơm jang, sek asong tơdrong jang, hơvơn đe sơnăm mơlôh vang pơm jang păng tơchơ̆t tơgŭm gah hnam oei tơpôl.

Tang măt ăn rim hơnih jang kơ dêh char hlôi tơl nơ̆r, tơblang hơdah lơ tơdrong mă đe hơdruh tơdăm tơrĕk truh. Pơma dơnuh hăm hơdruh tơdăm, ƀok Hồ Văn Mười,  Kơdră Hơnih vei lăng kon pơlei dêh char Lâm Đồng, pơtruh nơ̆r hăm hơdruh tơdăm kơchăng băt hơdah tơdrong hiôk vă pơm jang, iŏk yua mŭk drăm hlôi đei kơ tơring, khĭn pơtơm jang đơ̆ng dôm tơdrong jang trŏ ƀlep hăm tơdrong kĕ đei kơ tơring.