Năr hơtuch giĕng, unh hnam yă Rcom H’Kliơng oei tơ̆ plei Rưng Ma Nin, xăh Ia Rbol, dêh char Gia Lai đei ‘măng ngôi hơdai ƀơ̆t tơdrô ge, vang chơt hơiă yua kơ yă đei Khŭl Pơtrŭt hŏk pơhrăm Việt Nam pôk hơpăh ƀăng khen. Tang măt unh hnam vang truh Hop akŏm pôk pơ ư dôm tơdrong jang hŏk pơhrăm hơgei lơ̆m teh đak tơ̆ anih tơm Hà Nội ‘nao brŏk. Ƀok Nay Nhơn - ŏng kơdră kơ yă Rcom H’Kliơng, ‘noh jĭ thây pơtho đĭ pơdơh hưu, akhan tơdrong pơgơ̆r et sa tơƀôh jơhngơ̆m đon băt bơnê kơ mĕ ƀă hlôi hiơ̆k bơngơ̆t truh tơdrong hŏk pơhrăm kơ kon sâu:

“Unh hnam nhôn, mă đơ̆ng hơdrol sơ̆ tôch kơ mơmat tat, jơhnơr yă ƀok, mĕ ƀă jang sa gleh hrat, jang mir roh mă lei oei rong kon hŏk pơhrăm ‘lơ̆ng. Truh dang ei, tơdrong hơrih sa unh hnam nhôn đĭ sơđơ̆ng bơih păng kon hơ ‘lơ̆p hơnơ̆ng hŏk pơhrăm truh tôch. Mĕ ƀă hlôi hơdrin vă kon hơ ‘lơ̆p hŏk pơhrăm, mơmat tat truh dang yơ kŭm yak hloh, ‘meh vă kơ kon hơ ‘lơ̆p hŏk pơhrăm jing hơgei, tơgŭm đei yua ăn pơlei pơla păng tơdrong jang tơpôl. Đơ̆ng noh kon hơ ‘lơ̆p mơ̆ng nơ̆r mĕ ƀă, pơm kiơ̆ ƀlep trong jang, tơdrong tơgŭm păng khôi luơ̆t đơ̆ng Teh đak”.

Yă H’Kliơng tơbăt, đe kon yă pơtơm tih vơ̆ đơ̆ng rŏng kơ teh đak rơngei. Tơdrong hơrih sa tơ̆ tơring bri kông Ia Rbol, dêh char Gia Lai kơplăh doh sơ̆ tôch kơ mơmat tat. Đĭ đei khei ‘năr unh hnam lăp đei hơƀo hơdrĕng, ƀum ƀlang, ƀơ̆t lăp đei ‘măng ơ̆t pơngot. Lơ̆m mơmat tat ‘noh, klo kăn yă oei hơdrin hiơ̆k bơngơ̆t ăn kơ đe kon truh tơ̆ hnam trưng, hơ măn bơ̆n ƀum, hơƀo; ƀơ̆t lăp lê̆ tơmam sa đơ̆ng kơdih vă ăn kơ kon đei jơhngơ̆m năm hŏk. Yă chhôk ‘nă yua kơ đĭ đăng 9 ‘nu kon (5 ‘nu drŏ kăn, 4 ‘nu drŏ nglo) tă kơ hŏk jing jơnei ngăl, Bơngai jang pơgang, bơngai pơm thây kô pơtho, bơngai jang lơ̆m ƀô̆ đô̆i dăh mă anih jang teh đak đơ̆ng xăh truh tơ̆ dêh char.

“Sơ̆ mă đơ̆ng tơdrong hơrih sa oei mơmat tat ră, bơ̆ jang tôch gleh hrat ră mă lei athei adrin rong hok hŏk chư. Ƀât lăp phe sa, ƀa sŏng ưh kơmăh, hơbăn ao hrŭk ưh đei, mă lei inh oei hơdrin rong kon năm hŏk ‘mơ̆i. Yoa inh tơchĕng, kon hơ ‘lơ̆p gơ̆h hơrih sa hiôk chơt dăh mă ưh ‘nŏh athei đei hŏk chư ‘mơ̆i, đơ̆ng rong kơnh đei đon hlôh vao vă bơ̆ jang, rong ‘me kơdih kâu. Inh đĭ hloĭh 78 sơnăm bơih, hơpơi ‘mĕh mih ma duch nă lơ̆m pơlei hơdrin rong kon hŏk. Đei hŏk ‘mơ̆i mă gơ̆h đei tơdrong hơrih sa hiôk jơnap, gơ̆h tơgŭm ăn tơpôl, tơgŭm ăn pơlei pơla”.

Ƀok Nay Mun - Kơdră vei lăng Khul pơtrŭt hŏk pơhrăm xăh Ia Rbol, dêh char Gia Lai chhôk ‘nă yoa xăh Ia Rbol jĭ tơring teh đei tơdrong joăt hŏk pơhrăm. Nhen thoi ŭnh hnam ƀok Ksor Chuel oei tơ̆ plei Rưng Ma Nhiu đei pôk pơ ư jĭ "ŭnh hnam cử nhân". Ŭnh hnam yă Rcom H'Kliơng tơ̆ plei Rưng Ma Nin 'nao đei Khul pơtrŭt hŏk pơhrăm Việt Nam hơpăh ăn ƀăng khen yoa đei đon hơdrin hŏk pơhrăm kiơ̆ tơdrong jang hŏk pơhrăm truh đĭ chăl hơrih. Kiơ̆ đơ̆ng noh tơgop tưk tơiung tơdrong hŏk pơhrăm tơ̆ tơring.

"Yă Rcom H'Kliơng đei đĭ đăng 9 'nu kon hŏk gơ̆h hơgei ngăl. Dang ei đe kon hlôi hŏk đang păng mơ̆t jang tơ̆ dôm anih jang kơ teh đak bơih. Hơpơi 'meh kon pơlei pơla bơ̆n hŏk rok ŭnh hnam ‘nâu. Atŭm hăm 'noh, pơlung mih ma duch nă tơ̆ pơlei pơla jê̆ hơtăih, roi tơbăt vă dôm ŭnh hnam kŭm adrin bơ̆ jang păng rong kon hơ 'lơ̆p hŏk pơhrăm mă 'lơ̆ng, đơ̆ng rŏng kơnh mơ̆t jang tơ̆ anih jang kơ teh đak, pơvih pơvăn ăn kon pơlei, pơvih pơvăn ăn pơlei pơla".

Unh hnam yă Rcom H’Kliơng et sa chơt hơiă yoa đei Khul pơtrŭt hŏk pơhrăm Việt Nam hơpăh ăn ƀăng khen vă tơƀôh jơhngơ̆m đon ‘mêm bơnê tôch pơneh hăm tơdrong hơdrin đơ̆ng mĕ ƀă hlôi vei lăng, pơtho ăn kon sâu hơdrin hŏk pơhrăm. ‘Nŏh jĭ jơhngơ̆m đon pơnam hŏk đei chĕp vei đơ̆ng dôm jơhnơr hơdrol, vang tơgop tưk tơiung dôm kơjă kăp gĭt ‘lơ̆ng hơiă lơ̆m tơdrong hơrih sa tơpôl.