VOV4.Bahnar - “Hơ len hơ năp jang bơ ngai chĕp kơ̆l rim anih jang mưh lê̆ đei ƀôh tơ drong hiơ̆ kơ tơ lĕch jên tơ mơ̆t jên jang teh đak”, ‘nâu jĭ nơ̆r pơ ma hơ dăh đơ̆ng kơ dră chĕp kơ̆l Anih vei lăng kon pơ lei dêh char Dak Lak tơ̆ ‘măng hop akŏm Anih vei lăng kon pơ lei khei 8/2022 pơ gơ̆r ‘năr (13/9) ƀơ̆t hơ len lăng pơ tôch jang kiơ̆ trong tơ lĕch jang hơ tŏk tơ iung mŭk drăm - tơ pôl, vei sơ đơ̆ng teh đak khei 8 tơ lĕch hơ năp jang khei 9 păng dôm khei hơ tuch sơ năm. Găh trong tơ lĕch jang tơ mơ̆t jên jang teh đak sơ năm 2022, dêh char Dak Lak klăih song ăn dôm tơ drong jang păng Anih mong jên iŏk tơ gŭm asong tŏk iŏk ăn anih mong jên păh lăp păng iĕ hăm kơ sô̆ jên hloh 3.600 ti hlak jên.

Truh dang ei ‘nao tơ lĕch đei hloh 913 ti hlak jên, iŏk đei 26% trong tơ lĕch jang. Tŏ sĕt hloh pơ têng hăm jên tơ lĕch jang atŭm kơ lơ̆m teh đak ‘noh hloh 34%. Đơ̆ng rŏng kơ tơ blang hơ dăh dôm tơ drong tơm pơm ăn hơ nhăk truh hiơ̆ tơ lĕch jên jang, Anih vei lăng kon pơ lei dêh char Dak lak hlôi athei pơ jing 4 grŭp bơ̆ jang hăm dôm Tơ ‘ngla tơ mơ̆t jên jang vă hơ len lăng pơ tho tơ ƀôh, hơ met pơ ‘lơ̆ng mơ mat tat, tơ hlăk tơ hlĭn; athei bơ ngai chĕp kơ̆l rim anih jang athei pŭ hơ năp jang tơ dăh hơ nơ̆ng lê̆ đei ƀôh tơ drong hiơ̆ kơ tơ lĕch jên jang.

Thuem: Tơ blơ̆