VOV4.Bahnar - Lăp lơ̆m 1 giĕng đơ̆ng ‘năr 14-2 truh ‘năr 21/2, lơ̆m pơ lei tơm đei hloh 40 ‘nu jĭ ‘noh thây kô pơ tho păng hloh 430 ‘nu hŏk tro. Tơ̆ hơ năp đei ƀôh krê hơ mơt đơ̆ng jĭ hơ buh, Anih vei lăng pơ tho pơ hrăm pơ lei tơm Buôn Ma Thuột hlôi jang tơ gŭm ăn Anih vei lăng kon pơ lei pơ lei tơm ăn pơ dơh kơ năm hŏk kơ tă hăm hŏk tro đĭ đăng dôm grŭp lăm, ưh kơ jô̆ lăm 9 păng lăm 12.

Kiơ̆ kơ Anih vei lăng pơ tho pơ hrăm pơ lei tơm Buôn Ma Thuột, Dak Lak, jĭ hơ buh COVID-19 tơ̆ Dak Lak hơ nơ̆ng đei ƀôh krê hơ mơt hăm rơ bâu ‘nu jĭ lơ̆m năr, mă đơ̆ng tơ drong đei ƀôh bơ ngai jĭ hlôi đei tơ drong hơ met ăn hơ drol mă lei kơ sô̆ F0 tŏk lơ hlôi ƀơm ưh kơ ‘lơ̆ng tih truh đon tơ chĕng đơ̆ng thây kô pơ tho, hŏk tro, mĕ ƀă hŏk tro. Tang găn jĭ hơ buh COVID-19 hai, pơ tho hŏk đei yua hai, vei sơ đơ̆ng đon tơ chĕng ăn hŏk tro, mĕ ƀă hŏk tro, thây kô pơ tho hai ‘noh jĭ tơ drong jang tơm hơ drol đơ̆ng rim hnam trưng hŏk hrei ‘nâu.

Thuem: Tơ blơ̆