VOV4.Bahnar - Sơ năm 2021, Dak Lak dơ̆ng kơ jăp, yak hlŏh 1 sơ năm hăm lơ tơ drong nol, mơ mat tat păng jang đei lơ tơ drong gĭt kăl, pơih trong ăn sơ năm 2022 păng bơ̆ jang Tơ drong tơ chơ̆t đơ̆ng Hop akŏm Đảng ƀô̆ dêh char ‘măng mă XVII jăl jang đơ̆ng 2020 - 2025. Nhôn đei jơ apinh jet ƀok Nguyễn Đình Trung, Kơ dră jang lơ̆m Trung ương Đảng, Bí thư Đảng dêh char Dak Lak găh dôm tơ drong mă Đảng ƀô̆, Khul kơ dră pơ gơ̆r păng kon pơ lei dôm hơ drĕch hơ drung tơ̆ Dak Lak jang đei, kŭm hăm đon pơ hnŏng tôch ai vă bơ̆ jang đei “ƀar tơ drong jang tơm” lơ̆m dôm sơ năm đơ̆ng rŏng dơ̆ng.

- Ơ ƀok Nguyễn Đình Trung, Kơ dră jang lơ̆m Trung ương Đảng, Bí thư Đảng dêh char Dak Lak, sơ năm 2021 hlôi tôch, ‘nâu kŭm jing sơ năm mă blŭng Dak Lak tơ lĕch jang kiơ̆ tơ drong Tơ chơ̆t đơ̆ng Hop akŏm Đảng ƀô̆ dêh char ‘măng mă XVII păng trong jang mŭk drăm, tơ pôl 5 sơ năm (2021 - 2025). Apinh ih tơ roi truh 1,2 tơ drong jang ‘lơ̆ng hơ iă hlŏh mă dêh char Dak Lak iŏk đei lơ̆m sơ năm âu ki năng?

Ƀok Nguyễn Đình Trung, Kơ dră jang lơ̆m Trung ương Đảng, Bí thư đảmh dêh char Dak Lak

- Ƀok Nguyễn Đình Trung: Sơ năm 2021 ƀât mă tơ ƀâp lơ mơ mat tat yoa đơ̆ng jĭ Covid 19 păng pŭ lơ tơ drong ưh kơ ‘lơ̆ng đơ̆ng 1,2 tơ drong nai hai tơ̆ dêh char, Anih jang đảng dêh char, Khul kơ dră chĕp kơ̆l đảng dêh char akŏm jơ hngâm chĕp kơ̆l pơ gơ̆r pơ tho ăn rim anih jang đảng, khul kơ dră tơ ring păng kon pơ lei tơ̆ dêh char bơ̆ jang 'lơ̆ng tơ drong tang găn jĭ păng dôm tơ drong jang atŏk tơ iung mŭk drăm tơ pôl, tơ iung pơ jing Đảng, pơ jing anih jang chinh trĭ hăm đon tơ chĕng “roi mơ mat tat, roi adrin, roi tưk tơ iung tơ drong tơ guăt 1 ƀơ̆r đon, pơ hnŏng tôch ai mưh bơ̆ jang dôm tơ drong jang hlôi đei tơ lĕch”. Mă hơ tuch tơ drong jang sơ năm 2021, dêh char iŏk đei lơ tơ drong jơ nei 'lơ̆ng. Găh atŏk tơ iung mŭk drăm, tơ pôl 'nŏh đei 15/16 tơ drong hơ găt jang đei păng jang tŏk hlŏh nơ̆r hơ găt đei tơ lĕch. Lơ̆m nŏh, mong akŏm jên tơ mât jang lơ̆m tơ pôl pơ hlom đei hlŏh 42 rơ bâu 100 ti hlak jên, iŏk đei 141% pơ têng hăm nơ̆r hơ găt. Akŏm đĭ đăng jên thu mong kơ tĕh đak đei hlŏh 8.200 ti, iŏk đei 152% pơ têng hăm kơ sô̆ trung ương pơ jao. Kơ sô̆ xăh jang kĕh tơ ring tơ rang 'nao lơ hlŏh 2 xăh pơ têng trong jang đei tơ lĕch. Lơ̆m tơ drong jang atŏk tơ iung mŭk drăm tơ̆ tơ ring, ‘nŏh jang atŏk tơ iung unh hơ yuh rơ gŏh jĭ 1 tơ drong tôch ‘lơ̆ng mưh jang kơ măy kơ mŏk kơ dêh char. Dêh char sơng iŏk jên tơ mât jang đei 28 tơ drong jang, hăm kơ sô̆ jên kĭ pơ kăp hlŏh 24 rơ bâu ti. Lơ tơ drong jang hlôi bơ̆ jang vang tưk tơ iung tơ drong jang mŭk drăm, tơ pôl tơ̆ tơ ring. Sơ năm 2021, tơ drong tơ iung pơ jing đảng, pơ jing anih jang chinh trĭ đei năng kăl păng tơ lĕch jang hrơ̆ch ‘lơ̆ng, iŏk đei lơ tơ drong jơ nei.

- Lei a, hơ dai hăm dôm tơ drong jang đei găh mŭk drăm, tơ pôl, tơ iung pơ jing Đảng, pơ jing anih jang chinh trĭ kŭm đei dêh char Dak Lak hơ nơ̆ng tơ rĕk pơ gơ̆r jang. ‘Nâu đei năng jĭ tơ drong mơ mat tat, kăl đei pơ gơ̆r jang mă ‘lơ̆ng. Lei, mât lơ̆m sơ năm mă 2 bơ̆ jang kiơ̆ tơ drong Tơ chơ̆t đơ̆ng Hop akŏm mă XIII kơ Đảng păng Hop akŏm Đảng ƀô̆ dêh char ‘măng mă XVII, tơ drong jang ‘nâu vă tơ lĕch jang thoi yơ dơ̆ng hă ƀok?

- Ƀok Nguyễn Đình Trung: Tơ drong tơ chơ̆t đơ̆ng Anih jang đảng dêh char sơ năm 2022 chih hơ dăh: “Hơ nơ̆ng hơ tŏk tơ drong jang tơ iung pơ jing, hơ met ming Đảng kiơ̆ tơ drong tơ chơ̆t trung ương IV, jăl XII păng XIII hơ dai hăm bơ̆ jang kiơ̆ tơ drong tơ chơ̆t kơ sô̆ 05 păng Nơ̆r tơ chơ̆t kơ sô̆ 01, 'năr 18/5/2021 đơ̆ng Anih tơm Chinh trĭ păng 1,2 tơ drong jang tơm thoi âu:

            Mă 1, pơ gơ̆r tơ lĕch jang kiơ̆ Nơ̆r tơ chơ̆t kơ sô̆ 21, ‘năr 25/10/2021 đơ̆ng Khul kơ dră chĕp kơ̆l trung ương Đảng găh hơ tŏk tơ deong hơ met ming đảng păng anih jang chinh trĭ. Khŏm tang găn, sek tơ lang tơ păt kăn ƀô̆, đảng viên đei đon tơ chĕng ưh ‘lơ̆ng găh chinh trĭ, jơ hngâm đon, tơ drong arih xa, tơ chĕng pơm tơ plih kơ dih.

 Mă 2, pơ jing khul đảng viên rơ gei, đei jơ hngâm đon ‘lơ̆ng, bưng ai tih tơ găl hăm tơ drong jang. Tơ plih ‘nao, hơ met ming khul kơ dră pơ gơ̆r vă hơ tŏk tơ drong đei yoa đơ̆ng anih jang chinh trĭ hơ dai hăm tơ jur ƀiên chê̆. Hơ met ming khul kăn ƀô̆, bơ ngai jang kơ tĕh đak păng chih hơ dăh anih jang, tơ drong jang.

Mă 3, tơ plih ‘nao trong jang, hơ tŏk tơ drong chĕp kơ̆l pơ gơ̆r, kơ sư̆k tơ blăh đơ̆ng anih jang đảng, đảng viên. Lơ̆m nŏh hơ tŏk hơ năp jang yak hơ drol, jang tơ năp đơ̆ng đảng viên. Hơ tŏk tơ drong dăr lăng, vei kơ jăp ki luơ̆t..

Mă 4, hơ tŏk tơ drong đei yoa đơ̆ng tang găn, chă ƀôh, sek tơ lang xa pơ jĭp, dar dĕh tang găn đĭ tơ drong xa pơ jĭp, pơ huach kư̆ kă. Hơ tŏk hrĕnh tơ drong dăr hơ len, sek tơ lang dôm tơ drong glăi. Mă loi jĭ dôm tơ drong xa pơ jĭp pơm tơ tŏ đon tơ pôl.

Tơ drong mă hơ tuch ‘nŏh, mặt trận tổ quốc Việt Nam păng dôm khul jang chinh trĭ tơ pôl athei kơ chăng tơ iung tơ drong dăr lăng, tơ blang tơ ƀôh vang tơ gop nơ̆r tơ iung pơ jing Đảng, pơ jing Khul kơ dră pơ gơ̆r, pơ jing khul kăn ƀô̆, đảng viên mưh bơ̆ jang hơ năp jang đei pơ jao.

- Ƀât mă jĭ Covid-19 oei tôch hơ mơt, vă tang găn ‘lơ̆ng jĭ hai, jang atŏk tơ iung mŭk drăm tơ pôl hai păng jang đei dôm tơ drong kăl đơ̆ng Hop akŏm Đảng jơ̆p tơ ring tơ lĕch, Kơ dră chĕp kơ̆l đảng dêh char, Khul kơ dră chĕp kơ̆l Anih jang đảng dêh char Dak Lak đei trong jang, chĕp kơ̆l pơ gơ̆r jang thoi yơ tơ̆ hơ năp kơnh hă ƀok?

- Ƀok Nguyễn Đình Trung: Sơ năm 2022 tơ dra adrol tơ drong jĭ oei hơ mơt đĕch. Yoa thoi nŏh, Khul kơ dră chĕp kơ̆l đảng dêh char tơ lĕch tơ drong tơ chơ̆t kơ sô̆ 16 găh tơ drong chĕp kơ̆l pơ gơ̆r bơ̆ jang tang găn jĭ Covid 19 lơ̆n chăl ‘nao vă pơ gơ̆r rim anih jang chinh trĭ tơ lĕch dôm tơ drong jang tang găn jĭ. Lơ̆m nŏh chih hơ dăh dôm tơ drong jang tơm nhen:

Mă 1 kơ chăng hơ len năng pơ rang jĭ vă tơ tom pơ tho tơ ƀôh dôm tơ drong jang kăl, lăp ‘lơ̆ng vă huei đei tơ drong ưh ê, huei hrăt hrot bơ ngai jĭ tơ̆ hnam pơ gang lơ̆m tơ ring.

Mă 2 ‘nŏh hơ tŏk tơ drong pơ gơ̆r roi tơ băt vă pơ hlôh đon kon pơ lei lơ̆m tơ drong tang găn jĭ Covid 19.

Mă 3 ‘nŏh pơ tho ăn dôm Anih jang đảng tơ̆ apŭng, thĭ, plt păng anih jang đảng găh dêh char, dôm anih jang kơ pal kơ chăng hơ met trong jang pơm ‘lơ̆ng ăn tơ drong tang găn jĭ. Mă loi ‘nŏh jĭ ƀât têt Nguyên Đán Nhâm Dần.

Mă 4, hơ nơ̆ng bơ̆ jang ‘lơ̆ng Tơ drong tơ chơ̆t kơ sô̆ 128 đơ̆ng Khul kơ dră tĕh đak păng trong jang đơ̆ng Anih tơm jang pơ gang kŭm nhen dôm anih jang kơ dêh char. Lơ̆m nŏh tơ chĕng trŏ, tơ tom hăm dôm tơ drong jĭ vă đei trong jang lăp ‘lơ̆ng hăm rim tơ drong ƀơm truh tơ̆ jĭ. Pơm ‘lơ̆ng vă bơ̆ jang tang găn jĭ hai, jang atŏk tơ iung mŭk drăm tơ pôl kơ tơ ring hai.

- Lei a, bơ nê kơ ih hơ!

Hương Lý: Chih

Dơ̆ng: Tơ blơ̆