VOV4.Bahnar - Apŭng Krông Pach, dêh char Dak Lăk hơmet ‘lơ̆ng ăn pơgơ̆r Pơm lêh sâu riêng Krông pach. ‘Nau tơdrong đei kơdră chĕp pơgơ̆r apŭng tơroi tơbăt lơ̆m jơ hop akŏm tơbăt hăm khŭl chĭh kơtơ̆ng ang lơ̆m năr 22/8.

Sầu riêng ‘nŏh mĭnh lơ̆m dôm tơmam drăm hơnhăk đei iŏk yua kơ jăp ăn kon pơlei chŏh jang sa tơ̆ Dak Lăk

Pơm lêh sâu riêng Krông Pach ‘măng mă blŭng sơnăm 2022 hăm hơnăn “Atŏk ‘lơ̆ng Sâu riêng Krông Pach” gô pơgơ̆r blŭng a lơ̆m năr 1/9 păng đunh trŭh năr 3/9 tơ̆ Hơnĭh tơm thĭ trân Phước An păng mĭnh ƀar tơring lơ̆m apŭng Krông pach. Lơ̆m pơgơ̆r au gô đei lơ tơdrong jang ‘lơ̆ng hơ iă nhen: Jơnŭm kơchơ pơdă, tơƀô̆h rim tơmam drăm plei ‘long, chŏh jang sa kơ apŭng păng mĭnh ƀar tơring tơjê̆; Hop akŏm pơtrŭt krao hơvơn tơmơt jên jang păng atŏk tơ iung tơmam drăm chŏh jang sa, chŏh jang sa kơ jăp ‘lơ̆ng. Mă kăl, lơ̆m rim tơdrong pơgơ̆r Jŏh ayŏ - Tơƀô̆h tơbăt tơmang pơ hiơ̆, gô đei dơ̆ng rim tơdrong jang: Tơpăr khinh khĭ kâu, hao hla du, pơro ŭnh jrĕng tơ̆ đak, pơlong hao thŏng nan ...

Tơblơ̆ nơ̆r: Amazưt