Ƀlep lơ̆m năr tơbăt 92 sơnăm Năr Đe drŏ kăn Việt Nam, au ki, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Thủ tướng Tĕh đak Phạm Minh Chính hlôi pơma dơnŭh hăm bơngai drŏ kăn Việt Nam hăm hơnăn: “Atŏk kơtang hơtŏ hơnơ̆ng păng atŏk hloi dơ̆ng hơnăp jang kơ đe drŏ kăn lơ̆m atŏk tơ iung mŭk drăm-tơpôl”. Hop akŏm đei pơgơ̆r kơtă tơ̆ hơnĭh pơdăh tơm tơ̆ Hà Nội păng trư̆k tuyên hăm 62 hơnĭh pơdăh lơ̆m tĕh đak, hăm vang năm đơ̆ng rim Kơdră chĕp pơgơ̆r Đảng dêh char, pơlei tơm, Dơnŏ anĭh vei lăng kon pơlei rim dêh char, pơlei tơm păng hlŏh 5.000 ‘nu drŏ kăn lơ̆m khŭl, drŏ kăn jang ‘lơ̆ng lơ̆m rim tơdrong jang, kang ƀô̆ khŭl.

Rup ‘măng pơgơ̆r pơma dơnŭh

Tang măt Kơdră chĕp pơgơ̆r Đảng, Tĕh đak, Thủ tướng pơtrŭh nơ̆r apĭnh jet gia păng hmach chơt hơ iă hlŏh hăm rim đe yă, đe mĕ, đe pơmai, rim đe ŏh drŏ kăn Việt Nam. Thủ tướng sơkơ̆t hơdăh, Drŏ kăn Việt Nam rim chăl đei hơnăp jang tôch gĭt kăl, đei lơ tơdrong tơgop lơ̆m tơ iung pơjing, vei lăng păng atŏk tơ iung Tĕh đak. Đảng păng Tĕh đak ling lang lăng ba kơ jăp trŭh bơ̆ jang hơtŏ hơnơ̆ng drŏ nglo drŏ kăn păng kơ yuơ tơdrong gơ̆h hơgei kơ đe drŏ kăn hăm lơ trong bơ̆ jang, tơgŭm djru găh pơtho pơjing khŭl kang ƀô̆ drŏ kăn, vei lăng năng tông jơhngơ̆m jăn, tơgŭm drŏ kăn lơ̆m pơjing tơdrong jang ... Hăm dôm trong jang ‘nŏh, Việt Nam hlôi pơjing đei rơvơn hlŏh vă drŏ kăn roi năr roi tơƀô̆h hơdăh hơnĭh dơ̆ng, hơnăp jang păng đei lơ rơvơn vang tơgop ăn ŭnh hnam, kon pơlei pơla păng tơpôl. Mă lei, kiơ̆ đơ̆ng Thủ tướng, bơ̆n oei đei lơ tơdrong kăl iung jang vă hơnhăk đei tơdrong erĭh sa ‘lơ̆ng hơ iă hlŏh dơ̆ng ăn đe drŏ kăn, vă đe drŏ kăn đei rơvơn vang tơgop ăn tơpôl, ăn Tĕh đak, vă ư̆h kơ lê̆ bơngai bu hơchăng hŭt tơ̆ rŏng. Thủ tướng pơma hơdăh:“‘Măng pơma dơnŭh vă mơ̆ng, vang xek tơlang păng vang jang kiơ̆ rim trong tơlĕch jang hơtŏ hơnơ̆ng drŏ nglo drŏ kăn păng kơ yiơ tơdrong gơ̆h hơgei kơ đe drŏ kăn 3 tơdrong tơm ‘nŏh: Drŏ kăn hăm atŏk tơ iung mŭk drăm; Drŏ kăn păng rim tơdrong erĭh sa tơpôl; hơtŏ hơnơ̆ng drŏ nglo drŏ kăn; Drŏ kăn păng jơhnơr đơ̆ng rŏng. Bơ̆n kăl lăng dơ̆ng dôm tơdrong jang hlôi keh đang, jang tim mă đang vă hơnơ̆ng tơlĕch jang hơmet pơ ‘lơ̆ng, pơjing hơyak pran ăn bơ̆ jang, vang tơgop đơ̆ng đe pơmai ŏh. ‘Măng pơma dơnŭh ư̆h kơ kĕ vă xek tơlang keh đang rim tơdrong, mă lei bơ̆n jei ƀô̆h hơdăh, ling lang kơrŭn jơhngơ̆m xek tơlang pơ ‘lơ̆ng rim tơdrong đei ƀô̆h, hơdrin đĭ ai atŏk tơ iung.”

Thủ tướng iung pơma tơ̆ Hop akŏm pơma dơnŭh dĭh băl

Hăm trong hơtŏ hơnơ̆ng dĭh băl, tơpăt, ‘lơng hơ iă, rim bơngai tang măt hlôi tơlĕch nơ̆r apĭnh, pơma tơlech dôm tơdrong hơpơi ‘mĕh vă, tơdrong tơnap tap, tơhlăk tơhlĭn. Thủ tướng atŭm hăm rim hơnĭh tơm tơl hơdăh dôm tơdrong oei ƀơ ƀrĕh kơmăt, tơdrong oei tơtăm đơ̆ng đe drŏ kăn lơ̆m tĕh đak. Mă kăl găh pơ̆ih să kon jên tơmơ̆t jang vă đe pơmai ŏh gơ̆h chă tŏk iŏk ƀônh ƀŏ hlŏh dơ̆ng, yă Đỗ Thị Ninh găh Hơnĭh jang Jên hu ‘Mêm mơnat hơnĭh sơdrai Nghi Lộc, dêh char Nghệ An tơbăt:“Vă kon jên tơmơ̆t jang đei jing tơdrong tơm tơgop jang kiơ̆ jơnei rim trong tơlĕch jang đơ̆ng tĕh đak lơ̆m pơm dă ƀiơ̆ chă tŏk iŏk jên đơ̆ng đe ăn tŏk iŏk hăm jên chĕh lơ, pơm tơjur dơnŭh kơ jăp ‘lơ̆ng, atŏk kơtang kon jên jang lơ̆m tĕh đak, apĭnh khul kơdră tĕh đak đei trong pơ̆ih să hlŏh dơng ăn khul ăn tŏk iŏk păng kon jên tŏk iŏk hăn rim hơnĭh jang ‘mêm mơnat, adoi lăng ba kơ jăp trong bơ̆ jang vă rim hơnĭh jang jên hu tơgŭm ‘mêm mơnat đei atŏk tơ iung bơ̆ jang ba ăn kon jên hu”.

Kiơ̆ đơ̆ng Thủ tướng Phạm Minh Chính, Dơnŏ anĭh mong jên Tĕh đak kăl đei trong jang tơgŭm djru ăn rim hơnĭh jang mong jên tơgŭm mơnat păng pơ̆ih să dôm bơngai gơ̆h tŏk iok vă dă ƀiơ̆ chă tŏk iok đơ̆ng hơnĭh ăn tŏk iŏk jẻen hăm jên chĕh lơ păng vă rim hơnĭh mong jên tơgum mơnat đei tŏk iŏk kon jên jang tĕnh koăng hlŏh.“Dôm bơngai gơ̆h chă tŏk iŏk jên đơ̆ng Hơnĭh mong jên tơgŭm kơnat au oei tŏ sĕt ‘noh Dơnŏ anĭh mong jên kăl tơchĕng pơm lơ liơ pơ̆ih să ăn lơ bơngai gơ̆h tŏk iŏk, pơm pơđunh ƀiơ̆ kla ăn kon jên tŏk iŏk mă trŏ ƀlep, ăp lơ lŏh mă đei lăng jing tơgŭm ăn păng mư̆h pơ̆ih să bơih ‘nŏh kăl đei trong pơ prŏ sơđơ̆ng pơtrŭh ăn kon jên ăn rim bơngai gơ̆h chă tŏk iŏk păng dă ƀiơ̆ chă tŏk iŏk jên đơ̆ng đe hăm jên chĕh lơ. Dang ei’mĕh vă pơm dă ƀiơ̆ chă tŏk iŏk jên đơ̆ng đe hăm jên chĕh lơ ‘nŏh kăl đei lơ hơnĭh bơ̆ jang vang iung jang hloi mă lei hơnĭh mong jên pơm lơ liơ vă đe pơmai oh gơ̆h chă tŏk iŏk jên ƀônh ƀŏ ƀiơ̆, rơvơn hlŏh dơ̆ng păng hăp sơđơ̆ng ăn tơdrong ‘mĕh vă kơ đe sư, mă lei kăl pơkăp kơ jăp dĭh băl mơ̆n vă chă ăn hre đei tôm.”

‘Ngoăih kơ ‘nŏh lơ kơdră tang măt hlôi tơlĕch nơ̆r apĭnh đei ƀơm trŭh rim tơdrong iung jang vă đe drŏ kăn tơring chŏh jang sa vang iung jang kơtang păng đei tơgop lơ̆m tơdrong jang tơ iung pơjing Tơring tơrang ‘nao; trong jang yă kiơ vă pơtrŭt kơtang ăn hơtŏ hơnơ̆ng dĭh băl drŏ nglo drŏ kăn lơ̆m bơ̆ jang chă tơchĕng hơlen khoa hŏk kmăi kmŏk; athei Thủ tướng pơrô̆ athei rim hơnĭh bơ̆ jang kơrŭn đĭ ai pơjing rim hla bơar vă drơ̆ng nơ̆r ao tai Việt Nam chĭh tơmơ̆t lơ̆m tơdrong oei sa gĭt kăl dăr sơnăm kơ teh đak.