VOV4.Bahnar - Đơ̆ng rŏng lơ năr dăr lăng tơchă băt găh hơnĭh tơm tĕh tơdrŏ apŭng Kon Plông, dêh char Kon Tum, giĕng au ki, tơ̆ thĭ trân Măng Đen, apŭng Kon Plông, Khŭl bơ̆ jang Dơnŏ anĭh chĕp pơgơ̆r Tĕh đak găh tang găn hơlau tŏ ‘mi kial pơrăm hlôi bơ̆ jang hăm Dơnŏ anĭh chĕp pơgơ̆r Tang găn hơlau Tŏ ‘mi kial pơrăm păng tơchă dŏng dêh char Kon Tum. Atŏkkơtang jang hơdoi, iung jang tang găn hơlau tĕh tơdrŏ vă sơđơ̆ng akau jăn, mŭk drăm kon pơlei păng rim hơnĭh jang ming man ‘nŏh dôm tơdrong đei lăng ba kơ jăp hlŏh.

        Hla bơar tơbăt kơ apŭng Kon Plông, kơ Dơnŏ anĭh chĕp pơgơ̆r Tang găn tŏ ‘mi kial pơrăm păng tơchă dŏng dêh char Kon Tum ăn Khŭl bơ̆ jang đei ƀô̆h,  mă đơ̆ng tim mă pơm pơrăm găh bơngai adoi nhen muk drăm, mă lei dôm ‘măng tĕh tơdrŏ khei năr au ki hlôi pơm ăn kon pơlei tăr văr, tơtăm. Bơ̆ jang pơm sơđơ̆ng jơhngơ̆m đon kon pơlei, pơtho tơbăt tang găn hơlau mư̆h đei tơdrong hlôi đei khŭl kơdră chĕp pơgơ̆r apŭng Kon Plông tơlĕch jang ‘măng blŭng, mă lei tơdrong jơnei tim mă nhen hơpơi ‘mĕh vă. Tơ̆ hơnăp tĕh tơdrŏ ‘nŏh jing tơdrong sar bar hle, rim hơnĭh bơ̆ jang kơ dêh char bơ̆ jang tim gan hlô̆h vao tơdrong au, ƀok Văn Tất Cường, Kơ iĕng Kơdră chep pơgơ̆r Dơnŏ anĭh vei lăng Chŏh jang sa păng Atŏk tơ iung tơring tơrang dêh char Kon Tum, kơdră jang lơ̆m Dơnŏ anĭh chĕp pơgơ̆r Tang găn hơlau tŏ ‘mi kial pơrăm păng tơgŭm dŏng dêh char, athei:“Ĭnh apĭnh athei rim Hơnĭh tơm, Hơnĭh jang ƀơm trŭh iung jang hloi chă tơchĕng hơlen tơdrong tĕh tơdrŏ lơ̆m khei năr au ki tơ̆ dêh char Kon Tum, mă kăl kơ apŭng Kon Plông. Hrôih tơlĕch đei rim tơdrong băt hơdăh tơdrong tơm pơm ăn vă đơ̆ng nŏh tơbăt ăn kơdră tơring vă tơtom pơjing rim trong jang tang găn hơlau cham char pơrăm lơ̆m dêh char”.

‘Moi kiơ̆ tơgoăt iŏk nơ̆r tơgop đơ̆ng khŭl kơdră apŭng Kon Plông, dêh char Kon Tum păng tang măt ăn Dơnŏ anih tơm, Hơnĭh bơ̆ jang  kơpal adoi nhen rim bơngai joăt jang, Khŭl bơ̆ jang Dơnŏ anĭh chĕp pơgơr Tĕh đak găh tang găn tŏ ‘mi kial pơrăm akhan, ƀơ̆t măt akŏm lơ̆m dăr lăng dôm tơdrong pơm ăn păng đei ƀơm kơnê̆ đơ̆ng tĕh tơdrŏ hlôi đei ƀô̆h lơ̆m tơring. Kăl atŏk kơtang pơrô̆ pơrôp, pơtho tơbăt, chă hơvơn tơgŭm ăn kon pơlei, kơdră tơring ƀô̆h hơdăh tơdrong ƀơm răm adoi nhen tơdrong đei ƀơm kơnê̆ đơ̆ng tĕh tơdrŏ vă đei trong veh ver. ‘Nĕ pơhơi, adoi ‘nĕ răr văr, hli dêh hnang kơnh pơm kơnê̆ trŭh tơdrong erĭh sa, atŏk tơ iung mŭk drăm păng sơđơ̆ng tơring. Ƀok Nguyễn Đức Quang, Kơdră chĕp pơgơ̆r Hơnĭh bơ̆ jang Tang găn hơlau păng Hơmet pơ ‘lơ̆ng tŏ ‘mi kial pơrăm, Kơ iĕng kơdră Dơnŏ anĭh chĕp pơgơ̆r, Kơdră Khŭl bơ̆ jang pơma hơdăh:“Dăr lăng dơ̆ng trong jang tang găn hơlau, hơlen dôm tơdrong đei ƀơm trŭh iung tơ jră tang găn hơlau tĕh tơdrŏ, ‘moi kiơ̆ hla bơar pơtho tơbăt đơ̆ng Dơnŏ anĭh chĕp pơgơ̆r Tĕh đak găh tang găn hơlau tŏ ‘mi kial pơrăm păng dôm hla bơar đơ̆ng Viện Vật lý địa cầu, đơ̆ng Dơnŏ anĭh tơm Tơ iung pơjing ming man hơmet ăn kơdră tơring, kon pơlei băt vă iung jang tang găn hơlau vă hoei đei tơdrong hiong răm. Pơrô̆ athei rim hơnĭh bơ̆ jang găh au iung jang hơdoi hăm hơnĭh jang khoa hŏk chă tơchĕng hơlen hrôih tơchă băt tơdrong tơm pơm ăn. Đei ƀô̆h hơdăh đơ̆ng Sông Tranh bơ̆n gơ̆h chă tơchĕng hơlen băt hơdăh hrôih hlŏh, hơlen kơtang vă hrôih hơlen băt hơdăh, vă đei trong iung jang trŏ ƀlep, tĕnh koăng, jơnei păng pơkom jơ ‘năr”.

        Atŭm hăm atŏk kơtang jang hơdoi, iung jang tang găn hơlau tĕh tơdrŏ vă sơđơ̆ng jơhngơ̆m jăn, mŭk drăm kơ kon pơlei adoi nhen rim hơnĭh ming man lơ̆m apŭng Kon Plông, dêh char Kon Tum, găh tơdrong đunh đai Khul bơ̆ jang Dơnŏ anĭh chĕp pơgơ̆r Tĕh đak tang găn tŏ ‘mi kial pơrăm athei Dơnŏ anĭh chĕp pơgơ̆r tang găn tŏ ‘mi kial pơrăm păng tơchă dŏng dêh char Kon Tum pơjao ăn rim hơnĭh bơ̆ jang kơ tơring jang hơdoi hăm Viện Vật lý địa cầu, rim hơnĭh jang khoa hŏk tĕnh koăng tơlĕch jang chă tơchĕng hơlen tơdrong tĕh tơdrŏ. Viện Vật lý địa cầu đei hla bơar chĭh tơbăt păng hơlen vă Dơnŏ anĭh chĕp pơgơ̆r Tĕh đak găh tang găn hơlau tŏ ‘mi kial pơrăm jang tơgŭm tơbăt ăn Khŭl kơdră Tĕh đak đei trong jang kăl, đunh đai. Rim hnam kmăi đak tơlĕch ŭnh hơyŭh nhen: Thượng Kon Tum, Đak Ring adoi nhen hơnĭh ming man Pơnơ̆t đak anai kăl đei dăr lăng rim trong jang vă sơđơ̆ng ăn tơring găh pơbăh kiơ̆ trong lăng kơ jăp hăm tơdrong jang tang găn tĕh tơdrŏ.

     Bơngai chĭh: Khoa Điềm

Tơblơ̆ nơ̆r: Amazưt