VOV4.Bahnar -  Pơgê năr 5/10, tơ̆ Hà Nội, Khŭl jang Mơdro sa păng Kmăi kmŏk (VCCI) pơgơ̆r Hop akŏm hăm hơnăn: Hơmet pơ ‘lơ̆ng hơnĭh dơ̆ng kơ Dơnŏ anih jang kmăi kmŏk tơgŭm djru Việt Nam. Hrei au Dơnŏ anĭh jang kmăi kmŏk tơgŭm djru lơ̆m tĕh đak hlôi đei lơ trong jang hơ iă lơ̆m dôm sơnăm au ki pơđĭ găh lơ păng ‘lơ̆ng, tơmơ̆t dang 4.5% akŏp hơnĭh mơdro sa kơ Dơnŏ anĭh jang kmăi kmŏk pơm tơlĕch tơmam drăm. Kmăi kmŏk tơgŭm, tơgop atŏk kơtang tơdrong tơgoăt dĭh băl lơ̆m tơdrong pơm tơlĕch tĕch mơdro kơ hơnĭh jang kmăi kmŏk tơm kơ tơdrong jang mŭk drăm nhen tanh mei, pơm chơkhŏ, điên tư, choh jang sa, ka hơdang … hăm rim tĕh đak răt iok lơ păng pơkoĕl kơtang nhen Hàn Quốc, Nhật Bản, Mi, Châu Âu, Trung Quốc… Rim nơ̆r tơgop lơ̆m hop akŏm akhan, Khŭl kơdră chĕp pơgơ̆r Tĕh đak kăl đei trong jang tơgum djru hơnĭh mơdro sa bơ̆ jang kmaiw kmŏk tơgŭm djru. Atŭm hăm ‘nŏh atŏk kơtang jang hơdoi hăm rim tĕh đak lơ̆m apŭng plĕnh tĕh atŏk kơtang kĕ jang kơ hơnĭh mơdro sa lơ̆m pơtho pơjing khŭl jang, pơtho tơbăt trong bơ̆ jang kmăi kmŏk…

VOV/Amazưt tơblơ̆ nơ̆r