VOV4.Bahnar - Lơ̆m dêh char Khánh Hòa dang ei tŏk bŏk ming man 2 tơnô̆ pơm trong glung rĕnh Tu-Pơbăh hăm trong hơtăih 54km. Rim hơnĭh tơm, hơnĭh bơ̆ jang, tơring tŏk bŏk tơlĕch jang kơtang 2 tơdrong jang pơm trong gre rĕnh tơƀư̆h Vân Phong - Nha Trang hăm Tơdrong vă jang trong gre rĕnh Khánh Hòa - Buôn Ma Thuột.

Trong trôm Dốc Sạn tơ̆ jăl trong Nha Trang- Cam Lâm tŏk bŏk ming man

Rim tơdrong jang trong glung rĕnh mư̆h keh đang gô tơƀư̆h, pơjing rơvơn ăn tơring Nam Trung bộ atŏk tơ iung tĕnh koăng hlŏh. 8 khei au ki, yak hlŏh tơnap tap đơ̆ng jĭ hơbŭh Covid-19 pơm ăn, tŏ ‘mi kial ưh sơđơ̆ng, Tơdrong jang ming man mĭnh jăl trong grung rĕnh Tu-Pơbăh găh Hơlĕch jăl jang 2017- 2020, jăl trong găn hlŏh dêh char Khánh Hòa tĕnh koăng đei iung jang. Tơdrong vă jang au đei tơklăh jing 2 tơnô̆ jang ‘nŏh đei jăl trong Nha Trang - Cam Lâm atăih hlŏh 49km păng jăl trong Cam Lâm-Vĩnh Hảo atăih 5km, đei ming man kiơ̆ pơkăp BOT pơ đĭ kon jên jang tĕh đak păng hơvơn rim bơngai tơmơ̆t jên jang. Trŭh dang ei, tơdrong vă jang Nha Trang - Cam Lâm hlôi jang keh đang hlŏh nơ̆r pơkă hlŏh 1 khei, rŏ năng pơm keh đang lơ̆m tŏk bŏk sơnăm 2023, hrôih hlŏh pơtêng hăm pơ prŏ hơdrol 3 khei.

Tơblơ̆ nơ̆r: Amazưt