Tây Nguyên đei tŏ 'mi kial, teh păng cham char bri brăh 'lơ̆ng hơiă, jĭ tơdrong 'lơ̆ng vă tơchĕng hơlen, atŏk tơiung lơ kơloăi ‘long pơgang, lơ̆m noh đei dôm kơloăi 'long pơgang tôch lăp mưh pơtăm tơ̆ hơla yơ̆p bri. Tơdrong 'lơ̆ng vă jang tŏk đơ̆ng rŏng kơ tơmât hơdai kŭm pơih dơ̆ng đei tơdrong hiôk hian vă tơguăt tơring pơtăm hăm anih pơm tơlĕch păng anih tĕch mơdro. 'Ngoăih kơ sâm Ngọc Linh păng Hồng Đẳng Sâm hlôi đei băt hơdăh, dôm tơring athei hơnơ̆ng chă rơih 'long đei kơjă kăp, lăp hăm cham char bri brăh, vei lăng 'lơ̆ng gen păng pơgơ̆r pơm tơlĕch kiơ̆ tơdrong 'mĕh vă răt yoa. Vă pơtrŭt tơdrong pơtăm ‘long pơgang pơm tơmam drăm, athei tơgŭm hơdrĕch, ki thuơ̆t păng đei trong tĕch mơdro kơjăp ‘lơ̆ng; atŭm hăm 'nŏh chih hơdăh tơdrong đei yoa, hơnăp jang đơ̆ng tơpôl, tơ 'ngla bri păng anih tĕch mơdro.

Yă Nguyễn Thị Thu Hà, Kơdră chĕp kơ̆l Tơdrong jang đơ̆ng Grŭp jang Trường Sinh akhan, ‘long pơgang tơ̆ Tây Nguyên hlôi đei mĭnh ƀar tơring pơtăm xă bơih mă lei oei tam mă lơ kơloăi păng ‘nao dơ̆ng ƀât sơ̆k hơdrĕng hmă đĕch, tam đei pơm hơmet ‘lơ̆ng. Anih tĕch mơdro tôch 'mĕh pơjing dơ̆ng lơ tơring pơtăm hăm lơ kơloăi pha ra băl, hơdai hăm pơm tơlĕch tơmam mă ‘lơ̆ng: "Nhôn gô ưh đei dơ̆ng ƀât sơ̆k hơdrĕng hmă đĕch mă athei pơm đei tơmam ‘lơ̆ng hlŏh dơ̆ng nhen thoi pơgang, ‘long pơgang vă pơm tơlĕch pơgang mă ưh ‘nŏh tơmam vei lăng jơhngơ̆m pran gơ̆h tăh hrâu lơ̆m dôm tơmam nai. Ưh lăp jing dôm tơmam vă huch đĕch, mă bơ̆n gơ̆h pơm jing tơmam vei lăng jơhngơ̆m pran hai".

Lơ bơngai tang măt truh hop akŏm akhan, đơ̆ng tơlĕch jên jang truh tơring pơtăm đei yua oei ‘lơ̆ng ‘nŏh oei đei lơ tơdrong athei jang dơ̆ng. Blŭng a, tơring athei hơlen lăng, chih hla kak tơring pơtăm, chih hơdăh tơ 'ngla bri, cham char bri brăh, anih jang păng anih răt; rim tơring athei đei trong vei lăng bri, dăr hơlen rim tơdrong ƀơm truh bri ‘long ‘nao bluh, teh păng đak. Kŭm hăm 'noh jĭ chih hơdăh tơmam păng anih tĕch mơdro adrol kơ rơih iŏk kơmăy kơmŏk, chĕng tơring pơtăm; tơmam athei đei hơlen lăng chih hơdăh hơnăn, kơchơ̆t ‘lơ̆ng, tơdrong sơđơ̆ng păng chih hơdăh anih jang đei.

Ƀok Đoàn Ngọc Có- Phŏ Kơdră Anih vei lăng Choh jang sa păng Cham char Gia Lai ăn tơbăt: “Trŭh sơnăm 2030, tơdrong jang atŏk tơiung 'long pơgang tơ̆ hơla yơp bri đei dang 31.000 ha. Kơjă pơgang hla ‘long đơ̆ng Việt Nam tôch kăp gĭt. Mă lei, tơdrong atŏk tơiung ‘long pơgang athei tơklep hăm tĕch mơdro tơmam, pơm tơlĕch tơmam păng pơjing đei anĭh răt iŏk sơđơ̆ng ‘lơ̆ng ‘mơ̆i mă gơ̆h jang tŏk pran kơjăp."

Đơ̆ng dôm nơ̆r pơma, apinh tơ̆ hop akŏm, nơ̆r athei đei tơlĕch ăn Tây Nguyên 'nŏh jĭ kăl hơlen năng tơring pơtăm mă lăp, rơih đei trong jang ‘lơ̆ng gơ̆h jang kiơ̆ adrol kơ pơih xă; atŭm hăm 'nŏh, atŏk tơiung ‘long pơgang tơ̆ hơla yơ̆p bri athei đei tơdrong vang jang đơ̆ng anih tơmât jên jang đei jên lơ, đei kơmăy kơmŏk păng trong tĕch mơdro rơđăh ‘lơ̆ng. Đơ̆ng noh pơjing đei tơmam pơgang đơ̆ng hla 'long đei yă măk, tơgŭm ăn kon pơlei jang xa, pơm 'lơ̆ng ăn tơdrong vei lăng bri păng atŏk tơiung ‘long pơgang đunh đai.