Đơ̆ng rŏng 4 sơnăm jang kiơ̆, hơdai hăm dôm jơnei iŏk đei, tơdrong bơ̆jnag kiơ̆ luơ̆t tơ̆ Lâm Đồng oei đei 1,2 tơdrong tam mă ‘lơ̆ng. Tơdrong jang roi tơbăt, iŏk nơ̆r tơgop, hơlen lăng, dăr lăng păng hơmet pơ ‘lơ̆ng nơ̆r tơgop apinh tam mă hơnơ̆ng; tơdrong jang đơ̆ng Khŭl dăr hơlen kon pơlei, Khŭl dăr lăng tơmơ̆t jên jang đơ̆ng tơpôl tam mă hơtŏ băl. Kăl kơ lăng truh, tơdrong vang jang đơ̆ng kon pơlei lơ̆m 1,2 tơdrong jang oei tam mă ‘lơ̆ng, ƀơ̆t mă tơdrong hơgăt găh tơdrong phak hăm pơm glăi hơnăp jang tơbăt hơdăh, pơgăn dăr hơlen dăh mă ưh kơ jang kiơ̆ nơ̆r apĭnh đơ̆ng rŏng dăr lăng tam mă hơdăh.

Mơmat tat tơƀôh hơdăh tơ̆ dôm tơring đơ̆ng rŏng kơ tơmơ̆t hơdai pơlei, kueng kơphô̆. Ƀơ̆t kơsô̆ unh hnam kon pơlei tŏk, tơdrong pơgơ̆r hop akŏm păng iŏk nơ̆r tơgop kơtă athei đei lơ khei ‘năr, bơngai jang păng trong jang trŏ lăp. Ƀok Nguyễn Văn Dũng, Phŏ Kơdră Anih vei lăng kon pơlei xăh Hiệp Thạnh, dêh char Lâm Đồng, tơbăt:

“Tơring nhôn đơ̆ng rŏng kơ tơmơ̆t hơdai jur 50% lăp oei pă 9 tơ̆ pơlei. Mă lei kơsô̆ kon pơlei tôch kơ lơ dang  54.000 ‘nu, pơlei tŏ sĕt hloh ‘noh ji hloh 800 unh hnam, kơna tơdrong mă pơgơ̆r iŏk nơ̆r tơgop dăh mă dôm tơdrong hôp kơtă hăm kon pơlei tôch kơ mơmat tat. Tơdrong pôk rơih bơngai pơgơ̆r pơlei âu ki găh păih xăh nhôn tơlĕch jang kiơ̆ Luơ̆t păng kiơ̆ tơchơ̆t đơ̆ng dêh char, mă khan ‘noh jĭ tơdrong pơgơ̆r pôk yua đơ̆ng kon pơlei tơchơ̆t. Tơdrong mă blŭng ‘noh hôp vă iŏk nơ̆r tơgop kơtă đơ̆ng kon pơlei. Mă lei ‘noh ưh kơ tôm. Pơlei dang 1.000 unh hnam krao hơvơn lơ dêh ‘noh đei 100 unh hnam đei măt.”

Tơpă yan âu ăn ƀôh, bơ̆jang kiơ̆ kon pơlei pơm tơm tơ̆ tơring ưh khan lăp jing pơgơ̆r dôm ‘măng hôp trŏ tơdrong hơgăt, mă oei athei vei sơđơ̆ng kon pơlei đei tơdrong hiôk vang akŏm, tơgop nơ̆r păng tơchơ̆t dôm tơdrong gơh jang. Mưh trong jang pơgơ̆r tam mă trŏ lăp hăm tơdrong jang kơsô̆ kon pơlei păng tơring đơ̆ng rŏng kơ tơmơ̆t hơdai, tơdrong hơtŏk gơh pơm tơm đơ̆ng kon pơlei gô tơƀơ̆p tơdrong pơgăn.

Đơ̆ng tơpă yan âu tơ̆ tơring, dêh char Lâm Đồng apĭnh hơmet ming, tơmơ̆t dơ̆ng dôm tơdrong hơgăt vă vei sơđơ̆ng drơ̆ng 1 nơ̆r lơ̆m bơ̆jang kiơ̆ kon pơlei pơm tơm tơ̆ anih mơdro sa; pơjing  phần mềm hơdai, drơ̆ng nơ̆r tơdrong hơgăt, trong jang păng hla ar chih răk ‘lơ̆ng vă kơ rim tơring iŏk yua; tơgoăt hăm khŭl jang Trung ương. Dêh char kŭm athei Anih tơm Nội vụ pơjing hla ar pơtho păng pơhrăm ming tơdrong jang ăn kơ khŭl jang kơtă bơ̆jang kiơ̆.