Tơ̆ jơ sơng, Kơdră Quốc hội pơma hơdăh jang tơbôl kon pơlei đei hơnăp jang gĭt kăl lơ̆m tơdrong hơmet ming tơdrong tơbôl, hơtŏk loi dơ̆ng jang hơdai đơ̆ng 2 teh đak. Việt Nam ling lang lăng Hàn Quốc jĭ teh đak jang hơdai kăl hloh lơ̆m dôm tơdrong jang tĕch mơdro, mŭk drăm, tơmơ̆t jên jang, tơmang lăng, khoa hŏk - kơmăy kơmŏk păng pơtho pơhrăm. Lơ̆m 9 khei sơnăm 2026, akŏm jên tơmơ̆t jang kơtă đơ̆ng teh đak đe kơ Hàn Quốc tơ̆ Việt Nam đei 103 ti USD; jên tĕch mơdro 2 păh rim sơnăm đei đơ̆ng 80 truh 90 ti USD.

Tơmoi Hàn Quốc truh tơ̆ Việt Nam đei hloh 3 triệu ‘nu. Kơdră Quốc hội lăng ‘lơ̆ng dôm tơdrong tơgop đơ̆ng Khŭl jang Tơbôl Hàn Quốc – Việt Nam lơ̆m tơgoăt tơpôl bơngai Việt tơ̆ Hàn Quốc, tơgŭm ‘mêm mơnat păng pơtrŭt pơgơ̆r joh ayŏ, pơtho pơhrăm. 2 păh drơ̆ng nơ̆r hơnơ̆ng hơtŏk loi dơ̆ng jang hơdai, pơtrŭt tĕch mơdro, tơmơ̆t jên jang, mă loi ‘noh jĭ lơ̆m dôm tơdrong jang khoa hŏk - kơmăy kơmŏk, tơplih ‘nao, bán dẫn păng kơmăy gơh hơgei; hơdai hăm tŭn pran tơƀơ̆p pơma dơnuh đơ̆ng kon pơlei, tơgop pơm ‘lơ̆ng hloh tơdrong pơvei Jang hơdai gĭt kăl tôm tơdrong Việt Nam – Hàn Quốc.