Pơma tơ̆ jơ tơƀâp, Tổng Bí thư, Kơdră teh đak pơma hơdăh, Đảng, Teh đak păng kon pơlei hơnơ̆ng chih răk kŏng tih tên đơ̆ng dôm bơngai hlôi plang pơyơ̆r jơhngâm, chu lôch tang ăn teh đak. Jơhngâm đon băt bơnê athei tơƀôh hơdăh hăm dôm tơdrong jang 'lơ̆ng tơ̆ yăn âu, vei lăng jơhngâm pran, tơdrong arih păng đon tơchĕng ăn bơngai đei kŏng.

Khŭl drŏ kăn huơ̆r gre Trường Sơn đei pơjing kiơ̆ đơ̆ng khul linh Trung đội drŏ kăn huơ̆r gre, pơjing 'năr 18/12/1968. Lơ̆m khei 'năr tơblăh Mi, đe linh drŏ kăn yak hlŏh kơ băt dôm yơ trong kơnê̆ krê hơmơt, chơ chuĕn tơmam pơvih ăn tơdrong tơblăh păng chơ đe linh rơka năm tơ̆ anih hơmet. Sơnăm 2014, khul đei pôk ăn hơnăn Khul tơlinh tơblăh kơtang nuih mơng kơ kon pơlei.

Tổng Bí thư, Kơdră teh đak athei Anih tơm vei lăng khul linh teh đak jang hơdoi hăm dôm tơring hơlen năng, sek tơlang 'lơ̆ng rim tơdrong tơgŭm ăn dôm bơngai đei tôm tơdrong kăl; pơngơ̆t truh tơdrong khăm hơmet jĭ, tơgŭm ăn dôm bơngai đei tơdrong arih xa pơmat tat, pơjing tơdrong 'lơ̆ng vă hơnơ̆ng pơgơ̆r tơƀâp lơ̆m rim sơnăm. Atŭm hăm 'nŏh, athei khul chĕp kơ̆l Đảng, khul kơdră tơring păng dôm khul tơpôl hơnơ̆ng yak hơdoi, vei lăng năng tông bơngai đei kŏng hăm đon jang tơnăp, vă dôm tơdrong jang tŏk đơ̆ng teh đak đei ƀôh hơdăh lơ̆m tơdrong arih xa kơ dôm bơngai chu hŭt hơkâu yoa teh đak.