Rim bơngai tang măt sơkơ̆t hơdah chih akŏm Luơ̆t Hinh sư̆ (hơmet tơplih) noh athei mă hơdah, huach lơ jơ năr hăm đon tơchĕng 'nao hơgei, vei sơđơ̆ng tơdrong hơtŏ đơ̆ng pơkăp phak hăm tơdrong pơm yoch hli hlơt 'nao păng tơdrong pơih să tơchơ̆t tơgŭm, 'mêm bơnat đơ̆ng teh đak. Kiơ̆ kơ noh, bơngai pơm yoch kơchăng hrŭ 'mong, hơmet răm mă trŏ ƀlep gô đei hơlen tơchơ̆t tơgŭm vă hơlêm pơ-'lơ̆ng đon bơnôh păng jang 'lơ̆ng sơnong jang.

Tơrĕk truh tơchơ̆t gah pơkăp phak pơlôch, rim bơngai tang măt drơ̆ng nơ̆r sut hŭt lê̆ pơkăp phak pơlôch hăm 4 tơdrong yoch noh pơm tơsŭl tơsăl tơpôl teh đak, pơm yoch gah tơjră kon bơngai, pơm yoch gah tơlĕch tơblah tơblŭng păng tơdrong yoch pơm kơnê̆ vă tơjră jơnŭm pơgơ̆r kon pơlei. Rim bơngai tang măt pơtruh nơ̆r nĕ tam sut hŭt pơkăp phak pơlôch hăm tơdrong yoch tĕch răt ma tuý hli hlơt hlăm. Rim nơ̆r pơtruh ah 'măng hop akŏm adoi drơ̆ng nơ̆r hăm tơdrong chih akŏm hlôi đei pơkăp dôm tơdrong pơm yoch lơ̆m mạng tơpôl kiơ̆ tơdrong pơm, đơ̆ng hơmet, pơgơ̆r truh pơm jang, kơlih tang găn đơ̆ng mă blŭng noh gô kĕ tang găn tơdrong răm ăn kon pơlei hơdrol kơ jên pơtơm đei pơtruh.