20 tơring đei rơih iŏk lơ̆m 51 tơring tơnap tap hloh kơ dêh char Đăk Lăk. Lơ̆m ou, 14 tơring đei 7 trong tơlĕch jang tôch tơnap tap, đei lơ tơdrong tơnap tap găh trong hnam, choh jang sa păng tĕch răt tơmam drăm. Tơdrong vă jang tơlĕch ăn truh sơnăm 2030, mĭnh tơring đei mĭnh trong jang mŭk drăm rơgoh ‘lơ̆ng  dăh mă jang muk drăm dăr, mĭnh trong tơgoăt jang choh jang sa, pơm tơlĕch păng tĕch mơdro; tơgoăt atŏk tơ iung mŭk drăm hăm vei răk tơƀăk mong tơdrong oei sa joăt joe ‘lơ̆ng rŏ sơ ki, hơmet pơ ‘lơ̆ng hơnih oei sa.

Tơdrong ‘meh vă đei kon jên tơmơ̆t jang dang 5.000 ti hlak jên, ‘noh đei dang 3.000 ti hlak jên chă hơvơn kơtă tơ̆ tơring păng tơpôl vang iung jang, dang 2.000 ti hlak jên đơ̆ng kon jên bơ̆ jang dêh char. Tơdrong proh hơmet kon jên jang dôm yơ ‘noh gô mơ̆ng kiơ̆ kon jên bơ̆ jang kĕ đei dôm yơ păng chă hơvơn đei dôm yơ.

Tơ̆ Hop akŏm, kơdră chĕp pơgơ̆r rim hơnih bơ̆ jang dêh char păng tang măt ăn rim tơring hlôi tơlĕch ăn trong jang vă tơdrong vă jang hrôih đei tơlĕch jang kiơ̆ hloi. Ƀok Nguyễn Duy Tính, Kơdră chĕp pơgơ̆r Hơnih vei lăng kon pơlei tơring  Phú Mỡ, dêh char Đăk Lăk athei hrôih đei hla bơar chih pơtho tơbăt găh dôm tơdrong jang vă ăn jang hơdrol păng trong hơgrop kon jên tơmơ̆t jang vă hơmet ăn tơmơ̆t jang đơ̆ng blŭng sơnăm 2027 hloi:  “Akŏm tơ iung pơjing trong hnam, mă hơdăh rim hơnih ming man pơtruh đak ăn rim pơlei kon kông. Răt kmăi kmŏk tơmam drăm ăn rim hnam trương, mă kăl rim hnam trương teh đak rong ‘me ăn rim đe hŏk tro.”

Lơ̆m mă noh, Hơnih vei lăng Kon kông păng lui khop dêh char Đăk Lăk athei rim tơring rơih dôm tơdrong trŏ lăp hăm yan ou, iung jang dôm tơdrong rơvơn găh choh jang sa, tơdrong jang joăt joe sơ̆ ki păng tơmang pơhiơ̆ tơklep hăm tơdrong oei sa joh ayŏ kơ kon pơlei kơtă. Mĭnh trong jang kăl đei trong vei kơjăp hơnơ̆ng đơ̆ng rŏng đei tơgŭm djru.

Pơma pơtôch hop akŏm, ƀok Y Nhuân Byă, Kơ iĕng Kơdră chĕp pơgơ̆r Hơnih vei lăng kon pơlei dêh char Đăk Lăk, athei rim hơnih bơ̆ jang păng tơring sơkơ̆t hơdăh tơdrong jang, iung jang keh đang lơ̆m sơnăm, jang hơdoi proh hơmet khul jang, veh ver mơ̆t lĕch dih băl rim tơdrong vă jang. Ƀơ̆t măt, akŏm hơmet ăn dôm tơdrong rơvơn iung jang lơ̆m sơnăm 2027, tơlĕch jang hơdrol dôm tơdrong jang kăl hloh:  “Iung jang rim tơdrong vă jang tơklep hăm atŏk tơ iung mŭk drăm, vang iung jang kơtang lơ̆mdôm tơdrong jang, mă kăl pơm hơtŏk jang sa iŏk đei, hơmet pơ ‘lơ̆ng tơdrong hơrih sa kơ kon pơlei. Lơ loh, găh ŭnh hnam dơnuh jei jing minh lơ̆m dôm trong tơlĕch jang tôch kơ gĭt kăl. 20 tơring đei rơih tơmơ̆t jang ‘noh kăl iung jang dăr lăng, băt hơdăh tơdrong 'meh vă lơ liơ păng tơlĕch nơ̆r apĭnh iung jang mă trŏ lăp.”