Pơgê năr 7/10, Hơnih chĕp pơgơ̆r năm tơchă, kôch akŏm păng hơlen hơdăh hơnăn ƀô̆ đô̆i lôch dŏng teh đak dêh char Quảng Ngãi pơgơ̆r chơ ba, pơjao hloh 2.200 kơcheh kơting ƀô̆ đô̆i lôch dŏng teh đak ‘măng mă 4 ăn Viện Pháp y Quân đội vă khăm hơlen ADN, pơvih pơvăn ăn hơlen băt hơnăn ƀô̆ đô̆i lôch dŏng teh đak. Hơdrol pơm lêh pơjao, rim bơngai tang măt glơng gơvang pơkao, soh hlôt nhang, ‘măn mĭnh pơnĭt kŭp yom, ƀlŏk hơdơ̆r dôm bơngai hlôi plang ăn pham lĕch sĕch huŏng kơ yuơ tơdrong pơm tơm, rơngei hiôk hian kơ Teh đak. Rim kơcheh kơting đei dăr lăng, hơlen hăm hô sơ, răk vei kiơ̆ ƀlep tơdrong tơchơ̆t. Lơ̆m hloh 2 khei ou ki, rim khul iŏk kơcheh kơting kơ dêh char Quảng Ngãi hlôi kôch hloh 13.500 lŏk pơsat tơ̆ kơhrĕng Hơnih pơsat Teh đak, iŏk đei hloh 9.000 kơcheh kơting ƀlep ‘lơ̆ng vă khăm hơlen. Truh dang ei, dêh char hlôi pơjao hloh 6.800 kơcheh kơting ăn kơ Viện Pháp y Quân đội vă khăm hơlen ADN, tơgop hơlen băt hơdăh hơnăn rim ƀô̆ đô̆i lôch dŏng teh đak oei tim mă băt hơnăn.