VOV4.Bahnar - Khei 6/2021, Thủ tướng tĕh đak đei tơ drong tơ chơ̆t kơ sô̆ 984 tơ lĕch jang kiơ̆ tơ drong Tơ chơ̆t 82 sơ năm 2020 đơ̆ng Anih tơm Chinh trĭ jăl XII. Khul kơ dră tĕh đak athei dôm anih tơm, anih jang kơ pal, tơ ring tơ rang hlôh vao kơ jăp nơ̆r pơ tho, trong jang đơ̆ng Anih tơm Chinh trĭ. Kiơ̆ đơ̆ng noh, hơ met pơ ‘lơ̆ng dôm tơ drong ưh kơ lăp, tam mă ‘lơ̆ng, bơ̆ jang mă brĕ 1,2 trong jang, tơ drong jang tơm vă hơ met pơ ‘lơ̆ng dôm tơ drong oei tơ hlăk, hơ met ming, tơ plih ‘nao công ty choh jang xa, pơ tăm ‘long oei tôch kăl tơ̆ yăn âu. Pơ tôch dôm ƀai chih “Tơ drong tơ chơ̆t 30: athei đei tơ̆ yăn âu đơ̆ng công ty choh jang xa, pơ tăm ‘long tơ̆ Tây Nguyên”, ƀai chih mă hơ tuch đei hơ năn “Đon hơ mĕng, hơ pơi ‘mĕh đơ̆ng dôm tơ ring, anih jang”.
Lơ̆m kơ sô̆ 16 công ty choh jang xa, pơ tăm ‘long tơ̆ dêh char Dak Nông, đei 3 anih jang tơ mât jên jang hơ doi, 6 anih jang tơ klăh hŭt lê̆. Ƀok Nguyễn Xuân Tuấn, Kơ dră Lăm chih măt jang xa, tĕch mơ dro, Anih tơ lĕch nơ̆r sơ kơ̆t, tơ mât jên jang dêh char Dak Nông ăn tơ băt, dôm công ty tơ tă đei tĕh xă hlŏh 500ha ngăl, kiơ̆ nơ̆r pơ tho đơ̆ng Tơ drong tơ chơ̆t 82 kơ Anih tơm Chinh trĭ ‘nŏh athei pơm ‘lơ̆ng ăn tơ drong pơ gơ̆r jang đơ̆ng tĕh đak tơ̆ dôm công ty âu. Kơ plăh ‘nŏh, tơ drong hơ met ming, tơ mât jên jang hơ doi hrei ‘nâu tơ̆ tơ ring oei tơ hlăk lơ tơ drong, kăl chih tơ lĕch hrôih dôm trong jang, nơ̆r pơ tho tơ̆ tơ drong Tơ chơ̆t 82 vă hơ nơ̆ng tơ lĕch jang păng hơ met ming: “Bơ̆ jang Tơ drong tơ chơ̆t 82 đơ̆ng Anih tơm Chinh trĭ ‘nŏh hăm dôm công ty đei tĕh xă hlŏh 500ha tŏk tơ̆ kơ pal ‘nŏh tĕh đak vei kơ jăp jên jang lơ ƀiơ̆. Tơ dăh gơ̆h vă pơm ‘lơ̆ng ăn tơ drong hơ met ming mă lăp, đei trong jang ‘lơ̆ng hai ‘nŏh gơ̆h vei lăng trong jang công ty MTV. Kơ sô̆ jên hre đei pơ dui khei ‘năr kla păng gô đei trong sek tơ lang ‘lơ̆ng.”
Tơ drong tơ chơ̆t 82 đơ̆ng Anih tơm Chinh trĭ đei hơ mĕng hơ met pơ ‘lơ̆ng dôm tơ drong tơ hlăk lơ̆m trong jang, tơ drong tơ gŭm păng khôi luơ̆t hrei ‘nâu
Ƀok Lê Danh Thắng, Phŏ Kơ dră Anih vei lăng jên hu dêh char Dak Lak, ăn tơ băt, đơ̆ng rŏng đei nơ̆r tơ chơ̆t 82 đơ̆ng Anih tơm Chinh trĭ, dêh char athei gơ̆t lê̆ tơ drong hơ met ming, tơ mât jên jang tơ̆ 6/15 công ty choh jang xa, pơ tăm ‘long (9 công ty nai hlôi tơ mât jên jang hơ doi đang păng tơ plih jing anih jang đei 2 tơ ‘ngla). Kiơ̆ ƀok Thắng, tơ drong hơ len năng, hơ met ming, tơ lĕch trong jang gơ̆h tơ gŭm ăn dêh char sek tơ lang đei 1,2 tơ drong mơ mat tat, tơ hlăk tăk, mă loi găh jên hu hăm dôm anih jang athei tơ klăih hŭt: “Dak Lak đei 3 anih jang oei tơ klăh hŭt, mưh pơ jing trong jang ‘nŏh ưh hơ tŏ, vă akhan jên jang âm, thu ưh măh kla ăn jên tơ lĕch. Tơ drong ‘nâu lơ̆m nơ̆r tơ chơ̆t 82 đơ̆ng Anih tơm Chinh trĭ đei 1 nơ̆r chih akhan jên tĕh đak gô tơ gŭm 1 păh jên ưh măh vă gơ̆h đei tôm jên kla, đei tôm tơ drong vă tơ klăh lê̆ anih jang.”
Ƀok Trịnh Đình Trường, Kơ dră chĕp kơ̆l khul vei lăng, Kơ chă chĕp kơ̆l Công ty tơm jang hơ doi chĕh phe Gia Lai păng Công ty jang hơ doi hla che Biển Hồ, akhan, Tơ drong tơ chơ̆t 82 đơ̆ng Anih tơm Chinh trĭ hlôi asong ăn anih tĕch mơ dro đei đon hơ meng hơ met pơ ‘lơ̆ng dôm tơ drong tơ hlăk tăk lơ̆m trong jang, tơ drong tơ gŭm păng khôi luơ̆t hrei ‘nâu. Lơ̆m nŏh, pơ ma truh tơ drong hơ met ming, chih tơ mât dơ̆ng dôm tơ drong hơ găt gĭt kăl găh jên hu, thuê̆ păng trong tŏk iŏk jên vă jang xa hăm jên kon tŏ sĕt: “Tơ drong ‘nâu jĭ tơ drong glăi pha ƀiơ̆ găh luơ̆t, dôm tơ drong hơ găt adrol ki tam mă hơ met ming truh tơ̆ bơ̆n, yoa bơ̆n jĭ anih jang ‘nao. Tơ drong tơ chơ̆t đơ̆ng Anih tơm Chinh trĭ tơ mât yoa tơ̆ yăn âu, ƀơm truh tơ drong arih xa, truh tơ̆ dôm anih jang ‘nŏh jĭ 1 hơ yak năm kơ jung.”
Dăr lăng tơ drong hơ met ming, tơ plih ‘nao, tơ mât jên jang hơ doi tơ̆ dôm mir đak lar kơ dôm dêh char tơ̆ Tây Nguyên, ƀok Nguyễn Lâm Thành, Phŏ Kơ dră Anih vei lăng hơ drĕch kon kông kơ Kuô̆k hô̆i, akhan, tơ drong đei yoa đơ̆ng vei lăng, iŏk yoa tĕh hrei ‘nâu oei tam mă ‘lơ̆ng. Kiơ̆ ƀok Thành, hơ nơ̆ng bơ̆ jang kiơ̆ tơ drong tơ chơ̆t 30 đơ̆ng Anih tơm Chinh trĭ ‘nŏh, hơ dai hăm hơ met ming, chih tơ mât dơ̆ng dôm trong jang, tơ drong tơ gŭm ăn anih jang, athei hŭt lê̆ hloi dôm trong jang, tơ drong tơ gŭm hlŏh tơ drong, tam mă lăp: “Hăm tơ drong hơ găt luơ̆t hrei ‘nâu, bơ̆n pơ jao tĕh lơ, đang kơ ‘nŏh asong thuê hăm kơ jă tôch reh. Kơ lih yoa ưh kơ jăp lơ̆m trong jang jên hu, tĕh kơ na jing vei lăng ưh đei yoa. Mă loi sư pơm tơ lĕch tơ drong tơ gar tĕh. Găh tơ drong hơ tŏk vei lăng mă ‘lơ̆ng tĕh tơ̆ mir đak lar, kăl loi jĭ trong jang jên hu ƀơm truh tơ̆ tĕh, inh athei Khul kơ dră tĕh đak akŏm jơ năr tơ chĕng hơ len, sek tơ lang tơ drong ‘nâu.”
Ƀơm truh tơ drong tơ hlăk găh tĕh ‘nŏh jĭ tơ drong mơ mat hlŏh mưh hơ met ming, tơ plih ‘nao, tơ mât jên jang hơ doi
Lơ̆m dôm tơ dỏng hơ met ming, tơ plih ‘nao, tơ mât jên jang hơ doi tơ̆ công ty choh jang xa, pơ tăm ‘long, Kơ dră Kuô̆k hô̆i Vương Đình Huệ akhan, tơ drong ưh hơ iă găh tĕh ‘nŏh jĭ tơ drong tôch mơ mat păng kăl đei sek tơ lang mă ‘lơ̆ng hlŏh. Kơ dră Kuô̆k hô̆i tơ tă truh tơ drong pơ jao tĕh đơ̆ng dôm công ty choh jang xa, pơ tăm ‘long ăn dôm tơ ring hrei ‘nâu oei đei lơ tơ drong ưh kơ lăp, tam mă pran păng athei Jơ nŭm pơ gơ̆r kon pơ lei dôm dêh char đei trong dăr lăng mă kơ jăp. Truh âu kơnh, Kuô̆k hô̆i kŭm vă hơ len năng, pơ gơ̆r dăr lăng dơ̆ng tơ drong ‘nâu: “Tơ drong tơ plih ‘nao trong vei lăng, jô̆ hloi găh jên hu, găh choh jang xa pơ ma atŭm oei đei lơ tơ drong kăl jang. Tơ drong tơm ‘nŏh vă hơ tŏk tơ drong đei yoa mă hơ tuch đơ̆ng dôm công ty choh jang xa, pơ tăm ‘long, tơ gop dơ̆ng ăn tơ drong jang tŏk păng jên thu mong kơ tĕh đak ‘nŏh oei ưh dang ăi băl. Kơ sô̆ tĕh mă dôm công ty choh jang xa, pơ tăm ‘long pơ jao ăn tơ ring ‘nŏh tŏ sĕt đĕch. Mă 2, tĕh đei pơ jao ăn tơ ring, kơ sô̆ tĕh đei tơ drong tơ chơ̆t athei iŏk pơ dreu păng trong vă iŏk yoa tĕh oei tŏ sĕt ‘năi. Kơ plăh ‘nŏh kon pơ lei bơ̆n, mă loi jĭ kon pơ lei kon kông tơ̆ tơ ring groi kông oei ưh kơ măh tĕh oei, tĕh choh jang xa. ‘Nâu jĭ tơ drong mă bơ̆n athei tơ rĕk, athei đei trong jang mă lăp.”
Gơ̆h ƀôh, dôm tơ drong đơ̆ng hơ met ming, tơ plih ‘nao, tơ mât jên jang hơ doi tơ̆ dôm công ty choh jang xa, pơ tăm ‘long lơ̆m tĕh đak pơ ma atŭm, Tây Nguyên pơ ma hơ drô̆, hlôi đei kơ dră chĕp kơ̆l Đảng, tĕh đak lăng ƀôh păng tơ rĕk, tơ lĕch trong chĕp kơ̆l pơ gơ̆r vă jăh hơ met pơ ‘lơ̆ng dôm tơ drong tam mă lăp, tam mă pran ‘lơ̆ng.
Dơ̆ng: Tơ blơ̆
Viết bình luận