VOV4.Bahnar - Ƀlep ƀơ̆t tơ băt 132 sơ năm Năr rơ neh kơ ƀok Kơ dră Hồ Chí Minh (19/5/1890 - 19/5/2022), ‘năr 19/5, Báo điện tử Đảng Cộng sản Việt Nam tơ ƀôh rup tơ bang ‘nao trang kơ tơ̆ng ang điện tử Hồ Chí Minh vă hơ nơ̆ng tơ plih ‘nao, hơ tŏk ‘lơ̆ng tơ drong tơm, trong rup tơ bang pơm lăp hăm ‘meh vă đơ̆ng bơ ngai đŏk, lăng lơ̆m teh đak păng apŭng plĕnh teh. Ƀok Nguyễn Trọng Nghĩa, Bí thư Trung ương Đảng, Kơ dră Anih tơ roi tơ băt Trung ương vang akŏm păng pơ ma tơ̆ tơ drong gĭt kăl âu.

Pơ ma pơ gơ̆r tơ̆ jơ pơm lêh, ƀok Nguyễn Trọng Nghĩa athei Báo điện tử Đảng Cộng sản Việt Nam hơ nơ̆ng chih tơ roi, tơ mơ̆t dơ̆ng tơ drong kơ tơ̆ng ang, hla ar kăl vă tơ roi tơ băt, tơ gŭm buăl đŏk lơ̆m păng ‘ngoăih teh đak hlôh vao hơ dăh hloh, tôm tơ drong, ‘lơ̆ng, hơ iă găh tơ drong arih sa, tơ drong jang đơ̆ng kơ dră Hồ Chí Minh păng tơ mam mă Ƀok Hồ pơ sư̆ ăn. Hơ dai hăm ‘noh, vang tơ roi dôm tơ drong hơ iă, bơ ngai hơ gei, pơm tơ drong păr ang pran kơ tang, pơ lung dôm tơ drong jang pơ jei băl ‘mêm kơ teh đak, hŏk pơ hrăm păng pơm kiơ̆ jơ hngơ̆m đon ‘lơ̆ng đơ̆ng Hồ Chí Minh.

Thuem: Tơ blơ̆