Tơ̆ tơring Hòa Phú, Hơnih bơ̆ jang pơm hla bơar xek tơlang ƀlep jơ ‘năr pơkă hloh 99%, lăp oei 28 hô sơ keh đang klui găh lơ̆m tơdrong pơm hla bơar teh. Trong jang “Khul iung jang tĕnh koăng” păng “Thôn kơsô̆ - Rơvơn, tơpăt” đei tơlĕch jang tơgŭm ăn kon pơlei tơring hơtăih yăih chă pơm hla bơar ou to ƀônh ƀŏ hloh dơ̆ng.

Tơ̆ phương Ea Kao, Hơnih bơ̆ jang pơm hla bơar ăn 10 ‘nu kang ƀô̆, đei tôm kmăi kmŏk, hlôi xek tơlang keh đang hloh 2.500 hô sơ, pơm hla bơar keh đang ƀlep jơ ‘năr pơkă jơnei 99,7%. Phương tŏk bok iung jang pơlong năng ư̆ng yŭng kmăi kmŏk hơgei tơgŭm ăn kon pơlei ba hô sơ păng mơ̆t lăng dôm tơdrong kơtơ̆ng ang hăm mã QR, adoi tơgoăt hăm rim tơdrong jang lơ̆m kmăi kmŏk “Đăk Lăk kơsô̆”.

Hloh đơ̆ng năr lăng, ƀok Lương Nguyễn Minh Triết, Bí thư Đảng dêh char Dak Lăk athei 2 tơring hơnơ̆ng dăr lăng, iung jang ‘lơ̆ng hloh dơ̆ng, tơmơ̆t jên răt kmăi kmŏk ‘lơ̆ng, pơtho pơhrăm ming kang ƀô̆ chĕp pơgơ̆r vă rim hơnih bơ̆ jang pơm hla bơar iung jang jơnei, ‘lơ̆ng hloh dơ̆ng, tơgop tơ iung pơjing khul kơdră chĕp pơgơ̆r kơsô̆ tơ̆ tơring.