Tơ̆ jơ sơng, ƀok Lê Tiến Châu pơma hơdăh găh tơdrong tơgoăt tơgoăl joăt joe ‘lơ̆ng liĕm, tơklep kơjăp đunh đai tai sơnăm ƀar păh ƀar teh đak Việt Nam hăm Lào. Hăm pơlei tơm Hải Phòng, tơdrong tơgoăt tơgoăl jang hơdoi ƀar păh pơlei tơm hăm dêh char Viêng Chăn păng dêh char Oudomxay lơm dôm sơnăm ou ki jơnei hơ iă tơ̆ rim tơdrong jang tơ iung pơjing đảng, khul kơdră chĕp pơgơ̆r, pơtho pơhrăm, jang pơgang, tơmang pơhiơ̆, jang hơdoi tơmơ̆t jên jang, mơdro sa. Ƀok Bounthong Chitmany hôn bơnê tơdrong tơgoăt tơgoăl jang hơdoi, pơm ‘nhŏng oh ƀar păh pơlei tơm Hải Phòng hăm dêh char Viêng Chăn păng Oudomxay kơ Lào; bơnê tơdrong tơgŭm djru đơ̆ng Hải Phòng lơ̆m pơtho pơhrăm sinh viên Lào tơ̆ rim Hnam trương Đăi hŏk păng ‘meh vă pơlei tơm Hải Phòng hơnơ̆ng tơgŭm djru pơtho pơhrăm pơjing khul jang hơgei ăn kơ Lào păng atŏk kơtang jang hơdoi atok tơ iung tôm tong ƀar păh.