VOV4.Bahnar - Vă hơ iă kơ ‘măng tơ băt 91 sơ năm Năr pơ jing Đoàn TNCS Hồ Chí Minh, kơ sơ̆ 25/3, pơ gơ̆r jơ pơ ma nuh trư̆k tuyê̆n đơ̆ng Bí thư mă mônh Trung ương Đoàn TNCS Hồ Chí Minh Nguyễn Anh Tuấn, Kơ dră vei lăng Khul druh dăm Việt Nam hăm đoàn viên, druh dăm, hơ iŏh lơ̆m păng ‘ngoăih kơ tĕh đak hăm hơ năn "Hơ pơi ‘mĕh plang jơ hngâm – Trong arih kơ đe druh dăm".

Tơ̆ jơ pơ ma nuh, Bí thư mă mônh Trung ương Đoàn TNCS Hồ Chí Minh Nguyễn Anh Tuấn mơ̆ng nơ̆r tơ roi găh đon hơ pơi ‘mĕh đơ̆ng đe đoàn viên druh dăm, tơl tơ blang dôm tơ drong oei tam mă rơ đăh; mơ̆ng nơ̆r pơ ma apĭnh, tơ ƀôh trong đơ̆ng sơ năm mơ lôh lơ̆m păng ‘ngoăih kơ tĕh đak; pơ ma nuh găh tơ drong jang, hơ năp jang đơ̆ng anih jang Đoàn păng đoàn viên, druh dăm; tơ ƀôh trong vă anih jang Đoàn vang jang tơ iung ming dơ̆ng mŭk drăm tĕh đak đơ̆ng rŏng kơ jĭ Covid-19; atŭm hăm ‘nŏh, tơ lĕch đon pơ hnŏng, trong jang ăn Đoàn păng khul druh dăm, hơ iŏh iĕ tơ̆ hơ năp kơnh.

Dơ̆ng: Tơ blơ̆