Tơ̆ hop akŏm, Hơnih jang MTTQ Việt Nam dêh char Đăk Lăk hlôi tơroi gah tơdrong hơrih jang xa kơ dôm bơngai lĕch măt tơgar. Kiơ̆ kơ noh, hơnih pôk rơih kơsô̆ 4 đei 5 'nu lĕch măt tơgar jang tang măt Kuô̆k hô̆i; hơnih pôk rơih kơsô̆ 22 đei 5 'nu lĕch măt tơgar jang tang măt Hô̆i đŏng kon pơlei dêh char.

Rim bơngai lĕch măt tơgar hlôi tơroi gah tơdrong pơm jang, akŏm lơ̆m tơdrong hơtŏk mŭk drăm – tơpôl, hơtŏk tơdrong hơrih kon pơlei, mă kăl noh tơ̆ tơring kon pơlei kon kông; drŭt kơtang tơdrong hơmet 'lơ̆ng hanh chĭnh, tơplih kơmăi kơsô̆ păng hơtŏk tơdrong dăr hơlen pơm kiơ̆ pơkăp tơgŭm đơ̆ng khôi luơ̆t teh đak.

Pơma hăm kon pơlei tah hla, ƀok Lương Nguyễn Minh Triết, jang lơ̆m Trung ương Đảng, Ƀĭ thư Tĭnh uy Đăk Lăk sơkơ̆t hơđah, mưh đei kon pơlei pôk jang tang măt ăn Kuô̆k hô̆i jăl 16 gô hơdrin pơm jang tôm sơnong jang kơ bơngai tang măt, hơtŏk pơma đam hăm bơngai tah hla păng kon pơlei, tơtom tơroi gah dôm nơ̆r pơtruh, tơdrong hơpơi 'meh trŏ ƀlep hăm dôm hơnih jang kơpal.