VOV4.Bahnar - Vă hơ met ăn hop akŏm mă 3, Kuô̆k hô̆i jăl XV, kơ sơ̆ 28/4, ƀok Phan Đình Trạc – Kơ dră jang lơ̆m Anih tơm Chinh trĭ, Bí thư Trung ương Đảng, Kơ dră chĕp kơ̆l Ban Nội chính Trung ương kŭm hăm dôm bơ ngai tang măt Kuô̆k hô̆i dêh char Lâm Đồng đei jơ tơ ƀâp bơ ngai tăh hla tơ̆ xăh Xuân Thọ, plt Đà Lạt. 

Ƀok Phan Đình Trạc – Kơ dră jang lơ̆m Anih tơm Chinh trĭ, Kơ dră chĕp kơ̆l Ban Nội chính Trung ương pơ ma lơ̆m jơ tơ ƀâp bơ ngai tăh hla

Tơ̆ jơ tơ ƀâp, bơ ngai dơ̆ng tang ăn Khul tang măt Kuô̆k hô̆i dêh char Lâm Đồng roi tơ băt dôm tơ drong tơm lơ̆m hop akŏm truh, atŭm hăm ‘nŏh roi tơ băt găh tơ drong jang mŭk drăm, tơ pôl jăl khei mă 1/2022. Kiơ̆ kơ ‘nŏh, mă đơ̆ng ƀơm ưh ‘lơ̆ng đơ̆ng jĭ Covid-19 mă lei gơ nơm tơ lĕch jang hrơ̆ch ‘lơ̆ng lơ trong jang, mŭk drăm tơ pôl tĕh đak bơ̆n tŏk dơ̆ng tôch hrĕnh. Lơ̆m nŏh, GDP tŏk pran, dang 5,03%, anih pơ vih pơ văn jang tŏk truh 4,58%, tŏk vă jê̆ 1,5 ‘măng pơ têng hăm khei âu sơ năm 2020-2021.

Hơ drô̆ dêh char Lâm Đồng, thu mong jên ăn tĕh đak lơ̆m 4 khei blŭng sơ năm đei hlŏh 4.700 ti, tŏk 4,76% pơ têng hăm khei âu sơ năm sơ̆; tơ moi truh tơ mang lăng đei hlŏh 2,3 triu ‘nu, tŏk 33% pơ têng hăm khei âu sơ năm 2021. Bơ ngai tăh hla hơ nơ̆ng pơ ma tơ lĕch 1,2 tơ drong kăl đei ƀôh tơ̆ tơ ring, kăl đei anih jang kơ pal hơ met ming, ‘nŏh jĭ tơ drong: pơm ƀơk hla ar tĕh oei hiơ̆, tơ drong tơ proh trong iŏk yoa tĕh oei tam mă rơ đăh, tam mă ‘lơ̆ng, tŏk iŏk jên vă jang xa tôch mơ mat tat...

Dơ̆ng: Tơ blơ̆