Tơ̆ jơ tơƀơ̆p, tơdrong kơ ƀô̆ đô̆i so Sùng A Dê, hơdrung Mông oei tơ̆ tơring Văn Chấn, dêh char Lào Cai, hlôi pơm ăn lơ bơngai lui tơpă kơ yuơ trong ‘nhŏng tơgŭm kon pơlei yak hloh dơnuh hin lơ̆m kơtă tơ̆ groi teh kông tơmo rang rar, teh tơdrŭt hơlih prăt sơnăm. Lĕch đơ̆ng pơm ƀô̆ đô̆i Sư đoàn 316 (Quân khu 2) sơnăm 2010, đơ̆ng rŏng khei năr hơklen, 'nhŏng hlôi răt pơtăm kram Bát Độ chă pơtăm pơlong năng lơ̆m hơgăt teh să 15ha. Đơ̆ng rŏng 2 sơnăm, tơƀăng mă chăt gơ̆ tĕch ‘măng mă blŭng, mĭnh păh pơjing đei iŏk yoa kơjăp, mĭnh păh vei kơjăp teh, dă ƀiơ̆ đak lŏk jroh tơ̆ rim teh krông krang hang nak. Đơ̆ng trong jang ‘măng mă blŭng, truh dang ei hơgăt teh pơtăm kram Bát Độ tơ̆ tơring hlôi đei mơjĭt ŭnh hnam khul ƀô̆ đô̆i so jang kiơ̆ păng pơjing đei Khul jang hơdoi tơƀăng kram Bát Độ, tơgoăt jang hơdoi hăm mĭnh ƀar hnam kmăi lơ̆m dêh char. Ƀô̆ đô̆i so Sùng A Dê hlôi đei Thủ tướng Teh đak hôn bơnê păng pôk ăn Hla bơar bơnê kơ yuơ jang ‘lơ̆ng lơ̆m hŏk pơhrăm păng jang kiơ̆ jơhngơ̆m đon, trong bơ̆ jang kơ Ƀok Hô.“Đơ̆ng sơnăm 2021 truh dang ei, nhôn hlôi lang să đei 50ha. Nhôn hlôi kĭ pơkăp tĕch răt hăm rim công ty tơ̆ dêh char Lào Cai, drơ̆ng nơ̆r răt pơ đĭ tơƀăng lơ̆m khei ‘năr đunh đai, đei tơƀăng ‘noh đe sư năm răt iŏk hloi”.

Găh tơ̆ phương Bắc Nha Trang, dêh char Khánh Hòa, ƀô̆ đô̆i so Nguyễn Văn Dũng (rơneh sơnăm 1966), jĭ rơka 2/4, jei pơmăn lơ bơngai sa hôn kơtang hloh dơ̆ng kơ yuơ jơhngơ̆m đon ‘mêm kơ eng dih băl bôl boăl. Đei ‘măng bơ̆ jang tơ̆ Lữ đoàn 146, Tơring 4 Ƀô̆ đô̆i Đak dơsĭ, đei jơ ‘năr đunh bơ̆ jang tơ̆ achon dơsĭ Gạc Ma, rơka 61%, mă lei ƀok oei hơnơ̆ng atum hăm khul năm ngôi apĭnh jet gia pơma dơnuh hăm rim ŭnh hnam ƀô̆ đô̆i rơka, ŭnh hnam đei bơngai lôch dŏng teh đak, ƀlŏk hơdơ̆r dôm ƀô̆ đô̆i hlôi plang ăn pham lĕch sĕch huŏng lơ̆m rim jơ ‘năr tơbăt, năr 27/7 dăh mă năr lêh têt. Đơ̆ng rŏng lĕch đơ̆ng pơm ƀô̆ đô̆i, ƀok atum hăm rim ƀô̆ đô̆i so tơ̆ tơring iung jang tơdrong jang “ba oh năm tơ̆ hnam trương”, iŏk tơgŭm djru lơ hŏk tro mơti mơtek, hơrih sa tơnap tap đơ̆ng hŏk jăl kơđeh truh hŏk đĭ jăl pêng. Lơ đe oh gơnơm tơdrong lăng tông nông gia ‘noh hlôi đei rơvơn năm hŏk pơhrăm, đei rơvơn pơm tơplih tơdrong hơrih sa. Ƀô̆ đô̆i so Nguyễn Văn Dũng tơroi:“Ƀok Hô hlôi pơma “ƀô̆ đô̆i raka jo jăn mă lei ưh kơ hơven hơvo”. Hlôi đei jơhngơ̆m đon Ƀô đô̆i Ƀok Hô ‘noh ba lăng tơdrong ou vă hŏk pơhrăm, hơdrin vă pơm pơdrŏng ăn ŭnh hnam păng đei iŏk yoa ăn tơpôl păng vang tơgŭm djru ăn dôm bơngai tơnap tap. Kơna ba kĕ tơgŭm djru dôm yơ ‘noh ba tơgŭm dôm noh”.

Jang kiơ̆ nơ̆r athei jang kiơ̆ 05/2016 đơ̆ng Hơnih tơm Chinh trĭ găh atŏk kơtang hŏk pơhrăm păng jang kiơ̆ jơhngơ̆m đon ‘lơ̆ng trong jang hơ iă đơ̆ng Ƀok Hô, lơ̆m 10 sơnăm ou ki, rim khul păng rim ƀô̆ đô̆i so hlôi tơlĕch jang kiơ̆ jơ̆p jang dôm tơdrong jang ‘lơ̆ng hơ iă nhen: “Ƀô̆ đô̆i so tơgŭm dih băl atŏk tơ iung mŭk drăm”, “5+1”, “2 xut xa, 3 tơgum”;  rim tơdrong jang Mir - dơnou - hơdroong (VAC), Mir - dơnou - hơdroong - Bri (VACR), mir pơgar să ... đơ̆ng noh hlôi tơgop tơgŭm lơ bơngai lơ̆m khul yak hloh tơdrong dơnuh hin.

Jei đơ̆ng 2016 truh dang ei, rim khul hlôi ming man đei 23.000 pơbung hnam ‘mêm mơnat, tơgum djru sut sa hloh 43.000 hnam pơgia ăn rim bơngai lơ̆m khul hơrih sa tơnap tap. Dôm bơngai lơ̆m khul ƀô̆ đô̆i so oei plang ăn kơ triu met vuông teh vă pơm trong tơring tơrang ‘nao. Đơ̆ng noh lang să tơdrong hŏk pơhrăm păng jang kiơ̆ Ƀok đơ̆ng tơring. Trung tướng Khuất Việt Dũng-Kơ iĕng Kơdră chĕp pơgơ̆r Khul Ƀô̆ đô̆i so Việt Nam tơbăt: tơdrong hok pơhrăm păng jang kiơ̆ Ƀok Hô gô đei Khul Ƀô̆ đô̆i so Việt Nam tơplih ‘nao lơ̆m jăl truh ou kơnh:“Hŏk pơhrăm păng jang kiơ̆ Ƀok Hô kăl tơklep kơjăp hăm rim tơdrong jang pơting dih băl “Ƀô̆ đô̆i so pơm jŭk yŭk trong hơlou”, “Ƀô̆ đô̆i so tơgum djru dih băl yak hloh dơnuh, jang sa hơgei”, rim ‘măng pơgơ̆r đơ̆ng Trung ương păng tơring. Nhôn lăng jang kiơ̆ jơnei rim tơdrong jang chinh trĭ ‘noh jing tơdrong jang kăl hloh vă hŏk pơhrăm păng jang kiơ̆ Ƀok Hô. Bơ̆ jang tơchă ƀôh păng lang să trong jang, bơngai jang ‘lơ̆ng jei tôch kơ gĭt kăl. Truh ou kơnh nhôn jei tơplih ‘nao rim trong tơlĕch jang vă bơ̆ jang tơdrong ou ‘lơ̆ng hơ iă hloh dơ̆ng păng đei lang să kơtang ‘lơ̆ng hơ iă hloh dơ̆ng”.

Tơ̆ jơ tơƀơ̆p, Khul Ƀô̆ đô̆i so Việt Nam hlôi pôk ăn hla bơar hôn bơnê ăn rim khul, rim bơngai jang ‘lơ̆ng hơ iă hloh lơ̆m hŏk pơhrăm păng jang kiơ̆ jơhngơ̆m đon ‘lơ̆ng, trong jang hơ iă kơ Ƀok Hô jăl jang 2016-2026.