Kơdră Quốc hội Trần Thanh Mẫn pơma hơdăh, ‘nâu jĭ jơ bơ̆ jang tôch gĭt kăl, yoa Abnih jang Luơ̆t păng Tư phap jĭ anih jang đei anih dơ̆ng, hơnăp jang tôch gĭt kăl lơ̆m tơdrong jang kơ Quốc hội, mă loi ƀât mă Đảng bơ̆n năng tơdrong hơmet pơ ‘lơ̆ng trong pơgơ̆r, khôi luơ̆t jĭ 1 lơ̆m dôm tơdrong jang tôch gĭt kăl, ji “tơdrong kăl hlŏh lơ̆m tơdrong kăl”; tơdrong hơmet pơ ‘lơ̆ng trong pơgơ̆r vă jang tŏk.

Kơdră Quốc hội athei đe Kơdră chĕp kơ̆l Anih jang akŏm pơma nuh găh 5 grŭp tơdrong tih, ‘nŏh jĭ pơm hơdăh Trong pơgơ̆r jang đơ̆ng rŏng kơ tơmât hơdai; tơlĕch jang dôm tơdrong jang tih đei khul chĕp kơ̆l Đảng kơ Quốc hội, Anih chĕp kơ̆l pơgơ̆r Quốc hội, Kơdră chĕp kơ̆l Quốc hội pơjao, mă loi jĭ chih pơjing luơ̆t, tang găn xa pơjĭp, pơhuach kư̆ kă, pơm glăi; hơlen năng rim hla ar chih hơgăt luơ̆t; hơlen năng trong bơ̆ jang đơ̆ng khul kơdră pơgơ̆r tơring 2 tăl.