Kơsơ̆ 'năr brei (21/5), Hơnih jang vei lăng kon pơlei dêh char Quảng Ngãi pơgơ̆r hop akŏm sơkơ̆t tơdrong asong jên jang tơm lơ̆m tơring gah Pơmơ̆t dêh char. Truh dang ei, lơ̆m dêh char asong đei pơhlom 927 tih hlj, đei hloh 12% tơdrong pơkăp asong jên jang mă Thủ tướng teh đak pơjao, kơđeh hloh hăm pơkăp atŭm kơ jơ̆p teh đak. Gah tơring Pơmơ̆t dêh char Quảng Ngãi đei pơjao pơhlom 2.800 tih hlj asong jang tơm ah sơnăm 2026. Truh năr 20/5, tơring ou asong hloh 514 tih hlj, đei hloh 18% tơdrong pơkăp asong jên đei pơjao.

Kơdră Hơnih jang vei lăng kon pơlei dêh char Quảng Ngãi akhan, tơring Tây Nguyên jê̆ yak ah pơyan 'mi, mưh ưh đei hơtŏk tenh tơdrong asong 'noh gô pơrăm tih tên truh tơdrong ming man dôm tơdrong kăl. Kơdră Hơnih jang vei lăng kon pơlei dêh char pơgơ̆r hăm rim hơnih iŏk ming man, rim tơring pơkăp asong jên ming man tơm kiơ̆ rim khei, pơtruh tơchơ̆t pơm jang mă hơdah vă chih akŏm, chă hơlen lăng. Hơnih jang vei lăng kon pơlei dêh char pơgơ̆r hăm rim tơring akŏm sek tơlang mă keh dôm tơdrong tơhlăk tơhlĭn gah hơnih iŏk ming man mă pơdui đunh sơnăm. Dôm tơdrong oei tơhlăk 'noh athei jang hơdoi mă kơjăp, atŭm chă trong vă pơklaih, ưh đei lê̆ tơdrong chă tơpŭ dih băl kơnh pơrăm truh tơdrong jang atŭm.