Lơ̆m dôm năr tơjê̆ ou, đe chă jou tơ̆ Đăk Lăk pơngơ̆t kơ đon hăm lơ tơdrong mă đe hŏk tro teh tôn dih băl lơ̆m hnam trưng hŏk. Dôm clip teh hăm bôl lơ, pơrăm buăl hŏk hơdoi ƀơm hơtŏk lơ̆m mạng tơpôl ưh hơdrô̆ pơm blĕk mă oei tơƀôh hơdah gah tơdrong rơhiŭng rơhiăng lơ̆m tơdrong oei xa hăm dih băl lơ̆m hnam trưng hŏk, tơƀôh hơdah tơdrong jang hơdoi đơ̆ng unh hnam hăm hnam trưng tam mă kơjăp. Ƀok Lưu Tiến Quang, Phŏ Kơdră Hơnih jang Pơtho Pơhrăm Đăk Lăk ăn tơbăt, hơnih jang hlôi tơlĕch lơ trong jang vă hơtŏk tang găn đơ̆ng hrôih, đơ̆ng ataih.

Dôm hla bar tơchơ̆t pơgơ̆r, dôm trong jang tang găn păng tơjră teh tôn lơ̆m hnam trưng hŏk hơnơ̆ng đei tơbang lơ̆m prăt sơnăm hŏk. Tang găn teh tôn dih băl lơ̆m hnam trưng hŏk athei pơm jang đơ̆ng tơm dơnơm: pơjing minh hơnih hŏk pơhrăm sơđơ̆ng 'lơ̆ng păng hŏk tro đei chă tơmơ̆ng, chă tơroi, đei tơgŭm gah đon bơnôh mă tơtom.