Pơgê 21/5, Anih vei lăng kon pơlei dêh char Lâm Đồng pơgơ̆r hop akŏm hơlen lăng tơdrong mŭk drăm - tơpôl khei 5/2026, tơlĕch jang hơnăp jang tơm tơ̆ hơnăp kơnh. Tơ̆ hơnăp tơdrong lơ xăh, phường păng tơring kăp gĭt đei kơsô̆ jên tơlĕch jang kơ teh đak tôch kơ tŏ sĕt, Anih vei lăng kon pơlei dêh char Lâm Đồng athei rim tơring tŭn hrĕnh bơ̆jang, hơdrin truh ‘năr 30/6 iŏk đei tŏ sĕt tôch ai 40% trong tơlĕch jên jang. Sơnăm 2026, akŏm jên tơmơ̆t jên jang teh đak pơjao ăn kơ rim xăh kơ dêh char hloh 1.320 ti hlak jên. Mă lei truh dang ei ‘nao tơlĕch đei hloh 126 ti hlak jên, iŏk đei dang 11%, tŏ sĕt hloh kơsô̆ pơkăp 18%. Kăl kơ lăng truh, oei đei 10 xăh, phường đei pơjao jên lơ mă lei tam mă tơlĕch jên jang.

Kiơ̆ kơ hơlen lăng đơ̆ng anih jang kơpal, tơdrong tơm pơm ăn găh lơ yua đơ̆ng tơdrong jang pơgơ̆r ưh kơ tang, kang ƀô̆ jang ưh gan gơh, hla ar tơmơ̆t jên jang oei pơdui đunh păng tơhlăk tơhlĭn iŏk teh. Kơdră Anih vei lăng kon pơlei dêh char Lâm Đồng Hồ Văn Mười athei rim tơring kơchăng hơmet pơ ‘lơ̆ng pơmat tat, đei teh truh dang yơ bơ̆jang păng tơlĕch jên jang truh dang noh.