Dêh char Đắk Lắk (đơ̆ng rŏng kơ tơmơ̆t hơdai hăm dêh char Phú Yên) đei teh xă hloh 18.000 km², kơsô̆ kon pơlei hloh 3,34 triệu ‘nu, pơih đei teh xă hơtŏk tơiung hăm hơnăp jang tơƀưh Tây Nguyên păng Tơter đak dơsĭ Nam Trung Bộ. Tơdrong hơmet ming tơproh jang Đắk Lắk sơnăm jang 2021–2030, trĕng lăng truh sơnăm 2050 đei tơlĕch ăn vă hơlen lăng dơ̆ng anih dơ̆ng mŭk drăm, chĭnh trĭ kơ tơring, hơdai hăm iŏk jang đei yua rim tơdrong hiôk jang hơdai tơring, mơ̆t jang hơdai lơ̆m apŭng plĕnh teh. Dôm tơdrong hơgăt, trong jang tơlĕch ăn đei dăr hơlen kiơ̆ trong hrơ̆ch, tơklep hơdai ‘lơ̆ng dôm anih jang, tơdrong jang păng tơring, trŏ lăp hăm tơmam, jên jang yan âu, yak truh tơdrong hơgăt jang tŏk 11–11,5% sơnăm jang 2026–2030. Kiơ̆ kơ Phŏ Giáo sư, Tiến sĩ Lê Xuân Bá, sơ̆ pơm Kơdră Anih jang tơchĕng hơlen vei lăng mŭk drăm Trung ương, hơtŏk tơiung kơmăy kơmŏk kăl kơ đei lăng jing tơgŭm hơdrol lơ̆m tơdrong hơmet ming tơproh jang kơ dêh char.

“Tơproh jang hơtŏk tơiung kơmăy kơmŏk kơ dêh char Đắk Lắk tam mă đei bơngơ̆t truh trŏ tơdrong. Rŏ lăng khei ‘năr âu ki păng 2 – 3 sơnăm truh âu kơnh Đắk Lắk hơnat hơtŏk tơiung kơmăy kơmŏk nhen tơdrong hơmĕng, ‘nâu jĭ tơpă yan âu, mă lei ‘nâu jing tơproh jang sơnăm 2021 – 2030 păng trĕng lăng truh 2050, ‘noh dehe char Đắk Lắk athei tơlĕch tơdrong tơm hơtŏk tơiung kơmăy kơmŏk. Yua kơ ‘meh tŏk pơdrŏng ‘noh athei tơproh jang hơtŏk tơiung kơmăy kơmŏk tơ̆ kơsô̆ trŏ lăp”.

Tơgop nơ̆r ăn tơproh jang kơ dêh char Đắk Lắk, lơ bơngai joăt jang, bơngai vei lăng păng dôm anih mơdro sa kŭm akhan, tơproh jang kăl kơ pơm hơdăh hloh jang hơdai hơnih, trong nơnăm păng tơdrong ‘lơ̆ng jang tŏk đơ̆ng Tây Nguyên hăm Tơter đak dơsĭ Nam Trung Bộ. Hơdai hăm hơtŏk tơdrong tơgoăt tơring ‘moi kiơ̆ trong nơnăm gĭt kăl, logistics, tơ nŏk đak dơsĭ, ‘măng jang sơlam păng chă tơmang lăng tơklep hăm chĕp vei joh ayŏ tơring. Phŏ Giáo sư, Tiến sĩ Nguyễn Thị Phương Trâm, Kơdră Anih vei lăng găh Joh ayŏ Việt Nam, athei Đắk Lắk pơjing tơdrong jang hơtŏk tơiung chă tơmang lăng kiơ̆ tơdrong chĕp vei păng hơtŏk kơjă kăp gĭt joh ayŏ tơring.

“Lơ̆m tơproh jang păng hơmet ming tơproh jang, bơ̆n kăl kơ lăng kăl hloh dơ̆ng tơdrong joh ayŏ kơ dôm hơdrĕch kon kông. ‘Nâu jĭ tơdrong tơm tôch kơ gĭt kăl, pơm đei tơdrong hơiă kăp gĭt joh ayŏ kơ Đắk Lắk pơma hơdrô̆ păng Tây Nguyên pơma hơdrô̆. Rim kơjă kăp gĭt, rim tơdrong ‘lơ̆ng joh ayŏ kon kông tă kơ kăl 1 tơdrong joh ayŏ hơdrô̆ vă tơpôl hơrih sa, chĕp vei hơnih joh ayŏ ‘noh vă hơtŏk tơiung păng vei lăng”.

Chih iŏk dôm nơ̆r tơgop đĭ jơhngơ̆m, đei kơjă kăp gĭt đơ̆ng dôm bơngai joăt jang, bơngai vei lăng, anih mơdro sa tơ̆ hop akŏm, kơdră chĕp kơ̆l dêh char Đắk Lắk tơbăt gô hơnơ̆ng dăr hơlen, dăr lăng akŏm dôm tơmam ‘lơ̆ng, tơdrong đei yua kŭm nhen dôm tơdrong oei đei, ưh kơ ‘lơ̆ng vă jang pơkeh trong vă jang hơtŏk tơiung trŏ lăp hăm jăl jang sơnăm ‘nao đơ̆ng rŏng tơmơ̆t hơdai. Đắk Lắk băt hơdăh tơdrong hơmet ming tơproh jang athei đei bơ̆jang mă pơ ‘lơ̆ng, hrơ̆ch, vei sơđơ̆ng hơtŏk tôch ai jang tŏk, hơtŏk loi dơ̆ng jang hơdai tơring păng iŏk yua dôm tơmam, jên jang hơtŏk tơiung. Kiơ̆ kơ ƀok Đỗ Hữu Huy, Kơdră Anih vei lăng kon pơlei dêh char Đắk Lắk, tơdrong  hơmet ming tơproh jang gô jăh đei Jơnŭm pơgơ̆r kon pơlei dêh char set hơlen, kĭ ăn tơ̆ hơnăp kơnh.

“Anih vei lăng kon pơlei dêh char athei rim anih jang kơpal, anih jang, tơring, anih jang ƀơm truh păng anih jang hơdai roi tơƀôh akŏm tơmam, jên jang, chih iŏk tôm dôm nơ̆r tơgop đơ̆ng bơngai tang măt vă vei sơđơ̆ng hô sơ tơproh jang iŏk đei ‘meh vă. Hơdai hăm ‘noh, dêh char kŭm ‘meh vă hơnơ̆ng iŏk đei dôm nơ̆r tơgop đơ̆ng dôm bơngai joăt jang, bơngai jang khoa hŏk păng kơdră sơ̆ chĕp kơ̆l dêh char kiơ̆ rim jơhnơr tơ̆ hơnăp kơnh”.