Dêh char An Giang đei trong sơlam teh đak atăih 100km, tơter hăm dêh char Ta Keo păng Kandal kơ Campuchia. Lơ sơnăm au ki, tơdrong mơ̆t lĕch glăi hơnơ̆ng đei ƀô̆h hơmơt đei trŭh tơdrong kơnê̆ au to nhen tĕch mơdro bơngai, pơhlŭ pơhlom, hơlĕnh pơdăr dôm bơngai jang ŭnh hnam dơnuh năm păh to tĕch ăn rim khŭl, rim bơngai vă pơđep jang. Mă kăl ‘nŏh dôm tơdrong mơ̆t lĕch glăi vă tĕch mơdro tơmam drăm kơ̆m yak hlŏh tơring sơlam teh đak.

Vă ƀô̆h, tang găn tơtom dôm bơngai mơ̆t lĕch glăi kiơ̆ trong sơlam teh đak, mă kăl lơ̆m dôm khei ‘năr hơtuch sơnăm, khŭl bơ̆ jang tŏk bŏk prăt măng prăt năr iung jang tang găn. ‘Ngoăih khul Ƀô̆ đô̆i vei lăng sơlam teh đak oei đei vang iung jang kơ jăp đơ̆ng rim khul nhen kŏng ang, hơnĭh vei lăng tĕch răt tơmam drăm hăm teh đak đe vang iung jang. Hrei au, rim bơngai tĕch mơdro tơtông pơgơ̆m lơ̆m đak tih, gơmăng gơmu, tơring đei kon pơlei ƀar păh sơlam teh đak erĭh sa tơjê̆ dih băl ... vă chơ pơdŭ mong răk tơmam drăm tôch kơ lơ. ‘Nao au, tơ̆ koeng Vĩnh Xuyên, phương Núi Sam, pơlei tơm Châu Đốc, Khŭl bơ̆ jang kơ Kanh sat jang vei lăng Mŭk drăm Kŏng ang pơlei tơm Châu Đốc hlôi ƀô̆h păng drŭh rôp 2 ‘nu bơngai atŭm hăm tơmam drăm ‘nŏh: 400 jroong tơpu hơ̆t, 1 tŏ duk kmăi păng 4 tong gre bơbĭt. Thượng tá Nguyễn Đăng Khoa, Kơ iĕng Kơdră Kanh sat vei lăng Mŭk drăm Kŏng ang dêh char An Giang tơbăt: “Đe tĕch mơdro tơtông hơ̆t kơret au ki, lăp rôp đei 400 jroong tơpu hơ̆t đĕch, mă lei lơ̆m khul tĕch mơdro tơtông au lơ̆m mă nŏh đe hăp chơ pơdŭh đei trŭh 1.000 jroong tơpu hơ̆t, tơmam drăm lơ lŏh ư̆h khan tŏ sĕt ôh, mă lei kơ yuơ trong yak mơmat tat au to kơna lăp rôp đei 400 jroong tơpu hơ̆t đĕch, pă dôm yơ ‘nŏh đei hăp kơdau păh to dơ̆ng. Hrei au, pơgơ̆m lơ̆m đak tŏk, rim bơngai tĕch mơdro tơtông hơnơ̆ng tơplĭh trong yak, tơring năm, trong pơgơ̆r kơna tơmam drăm tĕch tơtông roi năr roi lơ”.

Đại tá Lý Kế Tùng, Kơ iĕng Kơdră chĕp pơgơ̆r Dơnŏ anĭh Ƀô̆ đô̆i vei lăng sơlam teh đak dêh char An Giang tơbăt, đơ̆ng blŭng sơnăm 2022, krao vĭh ƀiơ̆ rim hơnĭh gak vei lăng sơlam teh đak păng iung jang tang găn jĭ hơbŭh Covid-19. Măt bơngai oei tơ̆ hơnih gak roi tŏ sĕt, hơnih gak hơtăih dĭh băl, kơna khul bơngai tĕch mơdro tơtông jei pơlơ̆m kiơ̆ tơdrong au. Dôm bơngai tĕch mơdro tơtông roi năr đe hăp pơgơ̆r roi hrĕp: Mư̆h chơ pơdŭ tơƀơ̆p khŭl bơ̆ jang tang găn tĕch mơdro tơtông, đe hăt kơdau klĕnh hŭt tơmam drăm hloi, vă veh ver tơdrong xek tơlang tơdăh rôp đei, rim bơngai tĕch mơdro tơtông ư̆h kơ chă pŭ tung lơ hlŏh tơdrong pơkăp; đei ‘măng khul tĕch tơtông oei chă ôn hloi bơ̆n tơmam drăm kăp gĭt nhen măih, bơ̆n hơnam tơkhiĕn măih lơ̆m tơmam drăm hmă vă kĕ hlơp mư̆h yak găn hlŏh ‘măng sơlam teh đak ... Mă kăl, tơjê̆ au đei ƀô̆h đe tĕch mơdro ma tuý hloi, dôm bơngai au chĕp ba hloi bơ̆n phao. Đại tá Lý Kế Tùng tơbăt dơ̆ng:“Lơ̆m iung tơjră hăm khŭl tĕch mơdro tơtông tôch mơmat tat: măt bơngai khŭl kơnê̆ pơdôr vang tĕch mơdro tơtông roi lơ; mă ƀar ‘nŏh, kơ yuơ đơ̆ng răt re tĕch măt kơna đe sư oei hơdrin chă tĕch mơdro tơtông păng ôn hrĕp tơmam drăm đe hăp, vă veh ver hiong răm, veh ver khul tơm tĕch mơdro phak, kơna đe hăp jĭ tôch bơbrơ̆t, tơjră plơ̆ hăm khŭl bơ̆ jang dơ̆ng. ‘Ngoăih tơdrong bơbrơ̆t, rim đe hăp oei pơlơ̆m tơplĭh dih băl hla bơar; rim bơngai đei jau chơ tơmơ̆t tơmam drăm tĕch ôn, ‘nŏh tă chơ tơmam drăm tĕch mơdro ôn đơ̆ng dêh char anai mơ̆t tơ̆ An Giang dăh mă chơ tơmam drăm tĕch mơdro tơtông găn hlŏh dêh char An Giang. Kŏng ang, Hơnĭh vei lăng tĕch răt tơmam drăm hăm teh đak đe ... hlôi ƀô̆h păng rôp tôch kơ lơ tơmam drăm đơ̆ng pơlei tơm Hồ Chí Minh păng đơ̆ng Bình Dương năm tơ̆ au”.

Đơ̆ng blŭng sơnăm trŭh dang ei, rim khul bơ̆ jang dêh char An Giang hlôi dăr lăng, ƀô̆h, rôp hlŏh 140 ‘măng, găh tơdrong pơm glăi tĕch răt, chơ pơdŭ tơmam drăm kơ̆m, tơmam drăm tĕch tơtông, pơlơ̆m mơdro sa păng tơmam drăm ya. Akŏp kon jên vă jê̆ 120 ti hlak jên. Akŏp kon jên phak păng tĕch tơmam drăm đêl rôp iŏk tŏk hlŏh 6 ti hlak jên pơtêng hăm sơnăm 2021. Khŭl bơ̆ jang hlôi tơkêng 29 lơ̆m 40 ‘măng pơm glăi; tơkêng xek tơang 31 lơ̆m 69 ‘nu bơngai pơm glăi; kơ jă tơmam drăm rôp iŏk hlŏh 30 ti hlak jên.

Vă iung jang ‘lơ̆ng bơ̆ jang tơjră tang găn mơ̆t lĕch glăi, tang găn tĕch mơdro tơtông,pơlơ̆m mơdro sa păng tơmam drăm ya lơ̆m khei năr kơnh, An Giang gô hơnơ̆ng vei kơjăp rim khul bơ̆ jang, tang găn tĕch mơdro tơtông tơ̆ tơring sơlam teh đak. Rim Khul kŏng ang, hơnĭh vei lăng tơmam drăm tĕch răt hăm tĕh đak đe, Ƀô̆ đô̆i vei lăng sơlam teh đak iung jang hơdoi lơ̆m tơjră tang găn tĕch mơdro tơtông, chơ pơdŭ glăi tơmam drăm găn hlŏh tơring sơlam teh đak. Mă kăl tlăng kơjăp tơplĭh ‘nao, atŏk kơtang pơrô̆ pơrôp, pơtho khan kon pơlei oei tơ̆ tơring sơlam teh đak ư̆h kơ gơ̆h dŏng dôm bơngai tĕch mơdro tơtông, iung jang tơroi tơƀô̆h dôm bơngai pơm glăi, vang iung jang hơdoi hăm khŭl bơ̆ jang iung tơjră phă pơrăm tĕch mơdro tơtông, pơgơ̆m mơdro sa păng tơmam drăm ya.