Atŭm hăm jang kiơ̆ tơdrong jang vei lăng sơđơ̆ng tĕh đak, sơđơ̆ng tơring păng hơmet pơ ‘lơ̆ng tơdrong jang chĭnh trĭ tơ̆ tơring sơlam tĕh đak, khŭl Ƀô̆ đô̆i vei lăng sơlam tĕh đak oei jang hơdoi hăm kơdră đảng tơring, kơdră chĕp pơgơ̆r tơring, rim hơnĭh bơ̆ jang tơring tơlĕch lơ tơdrong jang tơgŭm kon pơlei atŏk tơ iung mŭk drăm păng jơhngơ̆m đon, tơgop tơ iung pơjing pơ đĭ kon pơlei vang vei lăng sơđơ̆ng dơ̆ng kơ jăp tơring sơlam tĕh đak.

Khŭl ƀô̆ đô̆i vei lăng sơlam tĕh đak jang hơdoi hăm kơdră tơring tơlĕch jang lơ tơdrong jang vă tơgŭm ăn kon pơlei atŏk tơ iung mŭk drăm

Kơđông Ba Sơn, Ƀô̆ đô̆i vei lăng sơlam tĕh đak dêh char Lạng Sơn vei lăng vă jê̆ 42km trong sơlam tĕh đak yak hlŏh 3 tơring Cao Lâu, Xuất Lễ, Mẫu Sơn. Groi tĕh găh să ‘nŏh groi kông, tĕh chŏh jang sa iĕ kơna tơdrong erĭh sa kơ kon pơlei tơƀơ̆p tôch tơnap tap.

Xơkơ̆t hơdăh tơdrong jang tơgŭm kon pơlei sơđơ̆ng erĭh sa, atŏk tơ iung mŭk drăm vă yak hlŏh dơnŭh hin, kang ƀô̆, ƀô̆ đô̆i tơ̆ Kơđông Ba Sơn ling lang “4 atŭm”, iung jang hơdoi hăm khŭl kơdră tơring păng rim hơnĭh jang tơ̆ tơring tơ iung pơjing trong jang sa, pơtho ăn kon pơlei jang sa atŏk erĭh sa sơđơ̆ng. Kang ƀô̆, ƀô̆ đô̆i hlôi chă tơra tơgop đei 2.000 dơnơm dơđăh ‘long hlache pơkao dreng ăn rim ŭnh hnam tơnap tap tơ̆ tơring Mẫu Sơn păng chă hŏk pơhrăm kih thuơ̆t ơng hơdrĕch vă atŭm hăm kon pơlei vei lăng năng tông ‘long pơgang gĭt kăl au. Ƀok Dương Trùng Lỷ (tơring Mẫu Sơn, apŭng Cao Lộc, dêh char Lạng Sơn) tơbăt:“Ŭnh hnam nhôn jei sơng iŏk đei 100 dơnơm dơđăh ‘long hla che pơkao dreng đơ̆ng Kơđông Ba Sơn tơgŭm ăn. Ŭnh hnam nhôn jei hlôi mơ̆t lơ̆m Kơđông vă hŏk pơhrăm kih thuơ̆t vei lăng ‘long pơtăm. Hlŏh đơ̆ng hok pơhrăm bơ̆n jang kiơ̆ kơna dơnơm ‘long blŭh vơ̆ jing ‘lơ̆ng. Bơnê kơ ƀô̆ đô̆i vei lăng sơlam tĕh đak hlôi tơgŭm unh hnam bơ̆n atŏk tơ iung mŭk drăm, sơđơ̆ng erĭh sa ăn ŭnh hnam nhôn.”

Kang ƀô̆, ƀô̆ đô̆i Kơđông ƀô̆ đô̆i vei lăng sơlam tĕh đak tơgŭm kon pơlei tơring sơlam tĕh đak yô̆ prĕh ƀa mư̆h pơyan kĕch yô̆ trŭh

Tơgĕch dôm hơnĭh tĕh hŏh tơjê̆ sơlam tĕh đak, kang ƀô̆ ƀô̆ đô̆i Kơđông Ba Sơn jang pơlong năng trong jang “Krăm Sơlam Tĕh đak Việt” tơ̆ tơring Xuất Lễ; răt pôk ăn 3.500 dơnơm kram Bát Độ ăn rim ŭnh hnam vang iung jang vei lăng sơlam tơring tĕh đak pơtăm păng vei lăng. Đơ̆ng rŏng 2 sơnăm, dôm dơnơm kram blŭh vơ̆ jing ‘lơ̆ng păng chăt tơƀăng. Ƀok Lý Văn Thắng, Kơ iĕng Kơdră chĕp pơgơ̆r tơring Xuất Lễ, apŭng Cao Lộc akhan, ‘nau trong jang hơ iă, tơgop gĭt kăl ăn tơdrong jang pơđĭ kon pơlei vang vei lăng pơm tơngla groi tĕh, tơring sơlam tĕh đak lơ̆m chăl hle.“Tơdrong pơtăm kram vă kon pơlei atŏk tơ iung mŭk drăm ‘nŏh jing trong jang ‘nao tơ̆ tơring. Lơ̆m khei ‘năr kon pơlei vei lăng, jei iung jang hloi vei lăng trong sơlam tĕh đak, hlôi tơgop pơm tơplĭh jơhngơ̆m đon tơchĕng, hlô̆h vao kơ kon pơlei, vang vei lăng trong sơlam tĕh đak, hơdrơ̆ng sơlam tĕh đak păng đơ̆ng rŏng au dơnơm tĭh jei hơnhăk đei iŏk yua kơ jăp ăn kon pơlei mơ̆n.”

Hăm hơnăp jang, jơhngơ̆m đon ‘mêm kơ eng păng tơgoăt kơjăp hăm kon pơlei, rim kang ƀô̆, Ƀô̆ đô̆i Kơđông Ba Sơn hlôi đei dôm tơdrong jang hơdăh, tơpă tơgŭm ăn kon pơlei lơ̆m tơring kơđông oei atok tơ iung mŭk drăm, lơ ŭnh hnam yak hlŏh dơnŭh hin. Lăp lơ̆m 3 sơnăm au ki, hơnĭh au pơjing đei 15 tơdrong jang pơyua ăn kon pơlei, pôk ăn 5.500 hơdrĕch ‘long ăn rim ŭnh hnam tơnap tap ... hăm kơ jă kơjên hlŏh 4 ti hlak jên. Dôm ƀô̆ đôi sơlam tĕh đak jei lăng ba kơ jăp trŭh tơ̆ đe hơ iŏh tơnap tap hăm rim tơdrong jang “ Ba ŏh năm tơ̆ hnam trương”, “Kon mŏm Kơđông Ƀô̆ đô̆i vei lăng sơlam tĕh đak”. Trung tá Hoàng Trung Hiếu, Chính trị viên Kơđông Ba Sơn tơbăt:“Tơlĕch jang hơdăh trong jang “Tơdrong jang pơyua ăn kon pơlei, tơgoăt dĭh băl kơjăp tơring hăm kơđông”, nhôn hlôi tơlĕch jang kơtang, atŭm hăm kơdră tơring tơlĕch jang kiơ̆ lơ tơdrong vă tơgŭm ăn kon pơlei tơring sơlam tĕh đak sơđơ̆ng erĭh sa, tơklep hăm pơlei pơla, đơ̆ng nŏh hơdrin tơgŭm djru, atŭm hăm ƀô̆ đô̆i vang vei lăng năng tông sơlam tĕh đak kơ jăp iăp kơtang.”

Dôm tơdrong jang ‘lơ̆ng hơ iă đơ̆ng kang ƀô̆, ƀô̆ đô̆i Kơdông Ba Sơn pơma hơdrô̆ păng khŭl Ƀô̆ đô̆i vei lăng sơlam tĕh đak dêh char Lạng Sơn pơma atŭm hlôi tơgop pơm ‘lơ̆ng hơ iă hlŏh dơ̆ng ăn Ƀô̆ đô̆i Ƀok Hô; jang kiơ̆ ‘lơ̆ng trong tơlĕch jang “Kơđông ‘nŏh hnam, sơlam tĕh đak ‘nŏh pơlei pơla, kon pơlei rim hơdrung ‘nhŏng ŏh pôm mĕ ƀă”; tơgŭm ăn kon pơlei rim hơdrung tơring sơlam tĕh đak roi năr roi sơđơ̆ng lơ̆m erĭh sa, tơgop vei lăng kơ jăp iăp kơtang tơring sơlam tĕh đak găh Tu kơ Tĕh đak.