VOV4.Bahnar - Kơ sơ̆ (21/8), nơ̆r tơ roi đơ̆ng Anih chĕp kơ̆l pơ gơ̆r khul linh Ƀô đô̆i vei lăng tơ ring sơ lam Kon Tum ăn tơ băt, khul linh dêh char jang hơ doi hăm khul linh vei lăng tơ ring sơ lam dêh char Tây Ninh pơ gơ̆r dŏng đei 1 ‘nu ŏh drŏ kăn 16 sơ năm tơ̆ xăh Đăk Xú, apŭng Ngọc Hồi, dêh char Kon Tum đe hơ lĕnh vă tĕch tơ̆ Campuchia hăm nơ̆r hơ lĕnh, jang hơ iơch, jên khei lơ.

Y Liên đei dŏng, vih dơ̆ng Việt Nam kiơ̆ ‘măng jang sơ lam Mộc Bài, Tây Ninh

Kiơ̆ nơ̆r roi tơ băt blŭng a đơ̆ng Y Liên hăm khul linh vei lăng tơ ring sơ lam, bơngai đei hơ năn Lê Ngọc Nhất juăt băl lơ̆m Facebook tĕch sư ăn công ty mă blŭng hăm kơ jă 1.800 USD, đơ̆ng rŏng kơ ‘nŏh Y Liên đei đe tĕch dơ̆ng ăn công ty nai. Yoa tơ drong jang tôch trăp, mơ mat tat kơ na jang ưh gơ̆h, Y Liên ‘mĕh pơ dơ̆h jang vă vih dơ̆ng tơ̆ Việt Nam mă lei công ty athei nôp 3.500 USD mă ưh ‘nŏh athei pơ hlŭ đei đơ̆ng 3 - 5 ‘nu bơ ngai năm jang ăn công ty ‘mơ̆i na ăn brŏk.

Tôch pŭn Y Liên đei khul linh vei lăng tơ ring sơ lam Kon Tum păng Tây Ninh jang hơ doi dŏng đei. Đơ̆ng rŏng kơ đei dŏng, kơ sơ̆ ‘năr 20/8/2022, Y Liên đei khul linh vei lăng tơ ring sơ lam Kon Tum păng Tây Ninh chơ vih tơ̆ Việt Nam kiơ̆ ‘măng jang sơ lam Mộc Bài, Tây Ninh păng vih dơ̆ng tơ̆ dêh char Kon Tum oei xa hơ dai hăm unh hnam.

Dơ̆ng: Tơ blơ̆