Hăm tor kơjung hlŏh 189km tơ̆ jih đak dơsĭ, Đắk Lắk hơnơ̆ng đei truh kơhrĕng tŏ ƀato lĕch tơ̆ đak dơsĭ chă rôp yâu păng rong ka hơdang. Atŭm hăm ‘nŏh hăm kon pơlei jang ka, đe kăn ƀô̆, linh vei lăng tơring sơlam hơnơ̆ng vei kơjăp, bơ̆ jang ‘lơ̆ng tơdrong jang tơ̆ tơring sơlam, hơnơ̆ng pơgơ̆r trư̆k, kơchăng tơblăh; kơchăng tơgŭm ăn kon pơlei jang ka păng vei lăng sơđơ̆ng ‘lơ̆ng tơ̆ đak dơsĭ. 

Tơ̆ tơnŏk ka Đông Tác, Thượng úy Phan Ngọc Dương, Kơdră Anih vei lăng tơring sơlam Đà Rằng, Kơđông linh vei lăng tơring sơlam Tuy Hòa ăn tơbăt: đơ̆ng blŭng sơnăm truh dang ei, hlôi đei kơhrĕng tŏ ƀato yâu ka ngư mât dơ̆ng, tĕch ka hơdang kŭm hăm kơhrĕng tŏ ƀato lĕch đơ̆ng tơnŏk vă năm jang xa, đĭ đăng đei vei lăng kơjăp ‘lơ̆ng: "Anih vei lăng tơring sơlam Đà Rằng hơnơ̆ng đei kăn ƀô̆ trư̆k mưh ƀato vih dăh mă lĕch đơ̆ng tơnŏk vă hơlen năng tôm tơdrong kiơ̆ hla ar pơkăp đơ̆ng khul linh vei lăng tơring sơlam. Jang hơdoi hăm tơnŏk ka athei roi tơbăt trong yak năm rôp yâu ka, pơm ‘lơ̆ng trŏ hăm tơdrong hơgăt đơ̆ng khôi luơ̆t găh tang găn rôp yâu ka glăi luơ̆t tơ̆ đak dơsĭ."

Tơnŏk Phú Lạc jĭ anih bơ̆ jang đơ̆ng hlŏh 650 tŏ ƀato yâu ka. 1 năr, dôm jĭt tŏ ƀato rôp yâu ka păng pơvih pơvăn chơ ka vih tơ̆ âu vă tĕch mơdro, chơ tĕch tơ̆ plt Hồ Chí Minh, Tây Nguyên păng tĕch ăn dôm hnam kơmăy pơm ka hôp. Khul linh vei lăng tơring sơlam găh Kơđông linh Hòa Hiệp trư̆k kŭm hăm bơngai jang tơ̆ tơnok ka, pơtho ăn kon pơlei pơm kiơ̆ mă tôm dôm tơdrong hơgăt rôp yâu ka.

Thiếu tá Lương Công Hậu, Phŏ ƀok Yŏng vei lăng Kơđông linh Hòa Hiệp tơroi: “Vă năm rôp yâu ka sơđơ̆ng ‘lơ̆ng, kơđông hơtŏk tơdrong roi tơbăt ăn kon pơlei jang ka băt hơdăh tŏ ‘mi kial thoi yơ; roi tơbăt ăn kon pơlei vă gơ̆h năm yâu ka sơđơ̆ng ‘lơ̆ng, pơm kiơ̆ mă ‘lơ̆ng dôm tơdrong hơgăt găh IUU, ưh đei pơm glăi tơ̆ tơring đak dơsĭ teh đak đe. Tơlĕch jang kiơ̆ trŏ hăm dôm tơdrong hơgăt đei kĭ pơkăp mưh mât lĕch lơ̆m tơnŏk hăm bato, pơm tôm hla ar kăl mưh vă năm yâu ka".

Dang ei oei mât lơ̆m khei ‘năr rôp yâu ka tơm. Ka rôp yâu đei lơ pơlung ăn kon pơlei jang ka ‘mĕh jang xa klĕch têt hloi, hơnhăk ba đon lui ăn dôm ‘măng năm yâu xa đei ka lơ. Hơdai hăm bơ̆ jang vei lăng  tơdrong pơm tơm, đe linh tơ̆ kơđông oei jing bơngai đei kon pơlei jang ka gơnang yoa mưh lĕch jang tơ̆ đak dơsĭ. Đơ̆ng nơ̆r pơtho pơm hla ar, roi tơbăt tang găn pơm glăi IUU, truh tơgŭm dŏng tơ̆ đak dơsĭ, um rup đei linh vei lăng tơring sơlam jing tôch juăt, tôch jê̆ hăm kon pơlei.

Ƀok Hà Thanh Hùng, tơ̆ phường Phú Yên, dêh char Đắk Lắk, tơroi: “Hăm đe linh vei lăng tơring sơlam nhôn tôch lăp đon mă đơ̆ng tơ̆ kông dăh mă tơ̆ đak dơsĭ, mưh ƀato nhôn hư âu to dăh mă ưh kơmăh yă kiơ ‘nŏh đei linh ƀô đô̆i vei lăng tơring sơlam truh tơgŭm ăn. Hăm dôm năr blŭng pơyan puih mak đe linh pơjing tơdrong ‘lơ̆ng tơgŭm ăn mih ma duch nă jang xa, dôm bơngai jang xa tơ̆ đak dơsĭ nhen nhôn, hơnơ̆ng tơtă, pơtho tơƀôh ăn nhôn dôm tơdrong mă teh đak kâm”.

Vă pơm kiơ̆ ‘lơ̆ng dôm tơdrong hơgăt găh rôp yâu ka hơdang, adrol kơ dôm ‘măng lĕch tơ̆ đak dơsĭ, khul linh Ƀô đô̆i vei lăng tơring sơlam dêh char Đắk Lắk jang hơdoi hăm tơ ‘ngla ƀato roi tơbăt ăn kon pơlei găh tơdrong tang găn rôp yâu ka glăi hăm luơ̆t (IUU). Mưh jang xa tơ̆ đak dơsĭ, ƀato athei roi tơbăt trong yak, vei kơjăp kơmăy hơlen năng păng chih răk mă tôm trong jang; rôp yâu trŏ tơring đei asong yâu păng ưh gơ̆h năm yâu ka tơ̆ tơring đak dơsĭ teh đak đe, dar deh pleh hŭt lê̆ the jơ̆k đơ̆ng Anih vei lăng Châu Âu hăm Việt Nam.

Đại úy Lô Văn Giới, Phŏ Kơdră jang Chinh trĭ, Kơđông linh Hòa Hiệp Nam, Ƀô đô̆i vei lăng tơring sơlam dêh char Đắk Lắk, ăn tơbăt: “Nhôn roi tơbăt ăn kon pơlei jang ka athei pơm kiơ̆ mă ‘lơ̆ng dôm tơdrong hơgăt mưh rôp yâu ka tơ̆ đak dơsĭ, mă loi athei tang găn tơdrong rôp yâu glăi hăm IUU. Kiơ̆ đơ̆ng noh, vang tơgop tơgŭm ăn kon pơlei hơđơ̆ng jơhngâm lĕch tơ̆ đak dơsĭ rôp yâu ka trŏ hăm tơdrong hơgăt, pơm ‘lơ̆ng vei lăng kơjăp tơdrong sơđơ̆ng, pơm tơm kơdih tơ̆ tơring đak dơsĭ kơ teh đak.”

Đơ̆ng tơnŏk duk truh tơ̆ tơring yâu ka lơ̆m đak dơsĭ, dôm ‘măng năm jang xa tơ̆ đak dơsĭ ƀât blŭng sơnăm, truh hloi lơ̆m dôm ‘măng đei tŏ ‘mi kial kơnê̆, Ƀô đô̆i vei lăng  tơring sơlam dêh char Đắk Lắk hơnơ̆ng đei măt jing anih gơnang yoa tôch sơđơ̆ng hăm kon pơlei jang ka. Tơdrong vang yak hơdoi kơjăp ‘lơ̆ng, tôch tơnăp păng ƀĕnh jơhngâm đon ‘mêm băt ‘nŏh ưh lăp vang vei kơjăp tơdrong pơm tơm, tơdrong sơđơ̆ng tơ̆ tơring đak dơsĭ đĕch mă oei hơmet kơjăp tơdrong pơvei đơ̆ng linh hăm kon pơlei, hơnơ̆ng tưk tơiung đon lui vă kon pơlei hơđơ̆ng jơhngâm lĕch tơ̆ đak dơsĭ, jang xa, pơm pơdrŏng ăn pơlei pơla./.