VOV4.Bahnar - ‘Năr 11/3/2022, Anih Radio nơ̆r pơ ma VN tơ̆ Tây Nguyên kŭm hăm Khul kơ dră tơ ring păng hnam tơ nŏ, kơ tum kơ tŏng ‘nhŏng ŏh, boăl juăt, bơ ngai jang hơ doi tung ba hơ kâu nhap Bơ ngai chih hla ar tơ roi Kpă SiMon, Sơ̆ pơm Phŏ Kơ dră chĕp kơ̆l Anih Radio nơ̆r pơ ma VN tơ̆ Tây Nguyên ƀŭ hơ met tơ̆ xăh Chư Mố, apŭng Ia Pa, dêh char Gia Lai.

Lêh pơ dong Bơ ngai chih hla ar tơ roi Kpă Simon

Ƀât 3 jơ 20 kơ sơ̆ ‘năr 9/3/2022, Bơ ngai chih hla ar tơ roi Kpă Si Mon, sơ̆ pơm Phŏ Kơ dră Anih Radio nơ̆r pơ ma VN tơ̆ Tây Nguyên, yoa jĭ ăl hlôi kơ tĕch jơ hngâm, lôch hơ chăng. ‘Nhŏng rơ nĕh ‘năr 3/8/1959, arih sot 63 sơ năm, đei hlŏh 25 năm bơ̆ jang plang jơ hngâm ăn tơ drong tơ roi hăm 6 nơ̆r kon kông Tây Nguyên kơ Anih Radio nơ̆r pơ ma VN tơ̆ Tây Nguyên, đơ̆ng bơ ngai tơ ƀlang, pơ re nơ̆r Jarai, truh pơm bơ ngai chĕp kơ̆l, vei lăng.

Unh hnam, bôl boăl jang hơ doi chơ ba hơ kâu Bơ ngai chih hla ar tơ roi Kpă SiMon năm ƀŭ tơ̆ pơ sat plei sư tơ̆ xăh Chư Mố, IaPa, Gia Lai

Hăm ‘nhŏng ŏh, bôl boăl, Bơ ngai chih hla ar tơ roi Kpă Simon oei xa tôch gơ̆h, hơ nơ̆ng chă tơ gŭm ăn bôl boăl, ‘nhŏng ŏh, băt ‘mêm tơ drong juăt ‘lơ̆ng đơ̆ng hơ drĕch kon kông Tây Nguyên, hơ nơ̆ng adrin chĕp vei nơ̆r pơ ma, chư chih, truh dôm tơ drong jŏh ayŏ kơ dŏ xoang ‘lơ̆ng hơ iă. Hăm tơ drong tơ roi pơ ma dôm nơ̆r kon kông Tây Nguyên, ‘nhŏng hơ drin hơ met pơ tho tơ ƀôh vă gơ̆h đei tơ drong tơ roi hơ iă hlŏh. Hăm bơ ngai mơ̆ng brŏ jơ̆p tơ ring, hơ năn Kpă Simon tôch juăt hăm pơ lei pơ la Tây Nguyên, kiơ̆ đơ̆ng ƀơ̆r đŏk tôch hơ iă lơ̆m rim tơ drong tơ roi đei pơih lơ̆m Radio.

Lôch hơ chăng, đơ̆ng rŏng dôm jĭt sơ năm bơ̆ jang tơ̆ Buôn Ma Thuột, dêh char Dak Lak, ‘nhŏng đei chơ vih, ƀŭ hơ met tơ̆ pơ sat pơ lei sư rơ nĕh sơ̆, jê̆ jâng kông Chư Mố, anih pơ dơ̆h ngôi Bến Mộng tơ ter đak krong Pa (găh apŭng Ia Pa, dêh char Gia Lai).

Dơ̆ng: Tơ blơ̆