VOV4.Bahnar - Đơ̆ng rŏng đunh khei ‘năr ưh đei drŏ drĕnh yoa đơ̆ng jĭ Covid-19, jơ va chĭng chêng kơ bơ ngai K’ho tơ̆ hơ la jâng kông Langbiang, thĭ trơ̆n Lạc Dương, apŭng Lạc Dương (Lâm Đồng) pơ tơm re hơ lơ̆k dơ̆ng vă chă sơng tơ moi lơ̆m pơ yan Puih mak ‘nao âu. Kŭm hăm ‘nŏh, dôm tơ mam yoa đơ̆ng kră sơ̆ nhen khan tanh, tơ drô ge đei hơ met tôm, tôch ‘lơ̆ng vă pơ vih ăn tơ drong ‘mĕh vă đơ̆ng tơ moi. Đơ̆ng tơ drong atŏk tơ iung chă tơ mang lăng lơ̆m tơ pôl âu hlôi tơ gŭm ăn tơ drong arih xa mŭk drăm kơ kon pơ lei tơ̆ âu tŏk ƀrư̆ ƀrư̆ rim năr.

Đơ̆ng rŏng pơm pơ hơi ƀiơ̆ tơ drong pơ vang găn tơ pôl, arih xa druh kiơ̆ tơ drong hle, tang găn ‘lơ̆ng tơ drong jĭ Covid-19 kiơ̆ Tơ drong tơ chơ̆t 128 đơ̆ng Khul kơ dră tĕh đak, jơ va chĭng chêng kơ kon pơ lei K’ho tơ̆ hơ la jâng kông Langbiang, thĭ trơ̆n Lạc Dương, apŭng Lạc Dương (Lâm Đồng) pơ tơm re dơ̆ng chă pơ vih ăn tơ drong ‘mĕh vă đơ̆ng tơ moi chă tơ mang lăng. Kră pơ lei Krajan Plin chơt hơ iă ăn tơ băt, mă đơ̆ng pơ dơ̆h đunh mă lei rim tơ drong jang pơ vih pơ văn ăn tơ drong chă tơ mang lăng đơ̆ng kon pơ lei tơ̆ tơ ring oei pơ gơ̆r ‘lơ̆ng đĕch. Tơ drong pơm pơ hơi ƀiơ̆ vei kơ hret lơ̆m tơ pôl, arih xa druh kiơ̆ jĭ Covid-19 lơ̆m khei ‘năr ‘nao ƀât blŭng pơ yan puih mak âu ‘nŏh jĭ 1 trong jang tôch tơ tom, lăp đon kon pơ lei. Kon pơ lei tơ̆ thĭ trơ̆n Lạc Dương chă hơ met tôm tơ mam, bơ ngai vă pơ vih ‘lơ̆ng rim tơ drong ‘mĕh vă đơ̆ng tơ moi chă tơ mang lăng lơ̆m sơ năm ‘nao âu.

Kră pơ lei Krajan Plin, tơ roi: “Đơ̆ng rŏng hlŏh 2 sơ năm pơ dơ̆h yoa jĭ Covid-19, Khul kơ dră tĕh đak asong ăn dôm anih jang pơ vih pơ văn jang xa dơ̆ng, ‘moi kiơ̆ khei ‘năr oei krê kơ jĭ vă jang atŏk tơ iung mŭk drăm tơ pôl, pơm hơ tŏk tơ drong arih xa hai, tang găn ‘lơ̆ng tơ drong jĭ hai, kon pơ lei tơ̆ tơ ring pơ ma atŭm păng unh hnam nhôn pơ ma hơ drô̆ hơ met tôm tơ mam vă pơ vih ăn tơ drong chă tơ mang lăng, mơ̆ng lăng đe tôn chĭng chêng ƀât năr têt đơ̆ng tơ moi. Rim tơ drong đơ̆ng tơ mam xa, đak nhă truh tôn chĭng đei hơ met ‘lơ̆ng ngăl vă mưh tơ moi truh ‘nŏh pơ gơ̆r hloi. Yoa thoi nŏh, iŏk yoa kơ unh hnam nhôn kŭm sơ đơ̆ng, tết truh kŭm pơ gơ̆r chơt nhen thoi dôm sơ năm adrol sơ̆”.

Kŭm hăm tôn chĭng chêng, pai tơ mam xa, tơ pôl bơ ngai K’ho tơ̆ thĭ trơ̆n Lạc Dương oei tanh brai vai khăn păng pai tơ drô ge hai vă tĕch păng et xa hăm tơ moi. Kiơ̆ ƀok Păng Ting K’Rè, tơ̆ plei Dơng 1, thĭ trơ̆n Lạc Dương, tơ drong kon pơ lei tơ iung, vei kơ jăp tơ drong juăt tôn chĭng đei UNESCO chih tơ băt jĭ tơ mam jŏh ayŏ kăp gĭt kơ kon bơ ngai ‘nŏh jĭ 1 tơ drong ‘lơ̆ng vă jang atŏk tơ iung chă tơ mang lăng. Kơ lih yoa, sư tơ gop ‘lơ̆ng chă tơ drong jang păng hơ tŏk iŏk yoa ăn lơ unh hnam, lơ̆m nŏh đei lơ bơ ngai tŏk klăih đơ̆ng tơ nuh hin, jang pơm pơ drŏng tôch tơ găl.

 “Ba pơ gơ̆r tôn chĭng vă pơ vih ăn tơ moi chă tơ mang lăng sư hơ nhăk ăn ba đei iŏk yoa kơ jăp, pơm hơ tŏk tơ drong arih xa ăn unh hnam. Lơ bơ ngai tơ̆ tơ ring đei tơ drong jang, arih xa sơ đơ̆ng. Yoa thoi nŏh, pơ lei pơ la roi tŏk. ‘Nâu jĭ tơ drong jang vang vei kơ jăp tơ drong juăt ‘lơ̆ng đơ̆ng sơ̆, chă pơ tho tơ ƀôh ăn kon sâu băt hơ dăh tơ drong juăt so, tơ drong juăt tôn chĭng chêng, ‘nŏh jĭ tơ mam đơ̆ng yă ƀok pơ sư̆, ‘măn ăn tôch kăp gĭt hăm kon pơ lei K’ho pơ ma adrô păng tơ pôl kon pơ lei kon kông Tây nguyên pơ ma atŭm.”

Kiơ̆ ƀok Trần Xuân Đường, Kơ dră vei lăng kon pơ lei thĭ trơ̆n Lạc Dương, apŭng Lạc Dương, đơ̆ng tơ lĕch lơ trong pơ vih ăn tơ moi chă tơ mang lăng âu sư hlôi hơ nhăk ba lơ tơ drong đei yoa tih. Yoa thoi nŏh, vei kơ jăp păng atŏk tơ iung dôm tơ drong juăt ‘lơ̆ng hơ iă đơ̆ng sơ̆ hlôi păng tŏk bŏk jing trong jang ‘lơ̆ng mă khul kơ dră tơ ring oei chă trong tưk tơ iung. Kŭm hăm dôm anih jang mŭk drăm nai, tơ pă mơ̆n chă tơ mang lăng lơ̆m tơ pôl tơ gop tôch lơ ăn tơ drong jang tơ jur tơ nuh hin tơ̆ tơ ring. Mă hơ dăh, lơ̆m thĭ trơ̆n dang ei pă 16 unh hnam tơ nuh, unh hnam pơ drŏng păng đei ƀôh roi đunh roi lơ.

Ƀok Trần Xuân Đường ăn tơ băt: “Nhôn đei trong chă tơ mang lăng lơ̆m tơ pôl akŏm găh jŏh ayŏ kơ dŏ xoang kơ hơ drĕch kon kông, mă loi jĭ tơ drong tôn chĭng chêng. Atŭm hăm ‘nŏh, rim tơ mam mă kon pơ lei kon kông tơ̆ âu jang đei tơ tă iŏk yoa vă pơ vih ăn tơ moi chă tơ mang lăng ngăl nhen tơ drô ge, hơ kăt, kơ đum kơ đŏng, khăn, che tanh… ‘nâu jĭ dôm tơ mam tơ moi tôch ‘mĕh răt. Yoa thoi nŏh chă tơ mang lăng lơ̆m tơ pôl sư tơ gŭm ăn kon pơ lei đei tơ drong jang, iŏk yoa sơ đơ̆ng, sut pơ đĭ pơ ngot, tơ jur tơ nuh hin păng pơm pơ drŏng ăn tơ ring”.

Gơ nơm băt tơ iung tơ drong pran đơ̆ng jŏh ayŏ kơ dŏ xoang đơ̆ng hơ drĕch kơ dih, bơ ngai K’ho tơ̆ hơ la jâng kông Langbiang, thĭ trơ̆n Lạc Dương, apŭng Lạc Dương (Lâm Đồng) hlôi pơih đei lơ trong chă pơ vih ăn tơ drong chă tơ mang lăng, vă jang atŏk tơ iung mŭk drăm hai, vang vei kơ jăp tơ drong juăt so hai. Hăm trong jang ‘nao, ưh jor tơ̆ hơ nô̆ kơnh, tơ ring âu gô jing 1 anih chă tơ mang lăng tôch hơ iă hăm tơ moi truh đơ̆ng jơ̆p tơ ring.

Quang Sáng: Chih

Dơ̆ng: Tơ blơ̆