Lơ̆m hơnih teh să hloh 100 met vuông lơ̆m pơgar kơ unh hnam ƀok Ksor Tân (kră pơlei Gà, xah Ia Boòng), Đô̆i K52 hlôi akŏm chơ chă sir kôch đei 18 kơting linh lôch tang. Dôm kơting linh lôch tang đei ƀŭ hơtaih băl pơhlom 20 cm. Dang ei tôm 18 kơting linh lôch tang hlôi đei akŏm vă sơkơ̆t ADN.

'Nguaih kơ tơring teh pơlei Gà, Anih pơgơ̆r khul linh xah Ia Boòng atŭm hăm dôm anih jang đei tơrĕk tŏk bŏk oei sơkơ̆t hơdah kơtơ̆ng ang, pơih să anih chơ chă tơ̆ tơring teh pơlei Sung O păng Boòng Nga. Xah Ia Boòng, lơ̆m apŭng Chư Prông so jing kơdrăn tơblah kơtang lơ̆m khei năr tơblah Mi. Kiơ̆ tơlĕch jang, truh năr 20/10, Đô̆i K52 gô keh đang sơnong jang tơ̆ xah, hơmet ăn 'măng pơm jang akŏm sir kôch kơting linh lôch tang tơ̆ teh đak Campuchia lơ̆m pơyan phang 2025–2026.