Hrei ou, dêh char Dak Lăk đei hloh 137.000 ‘nu đang viên, 1.045 khul đảng viên tơring hăm hloh 6.000 chi ƀô̆. Lăp đơ̆ng rŏng hơmet pơ ‘lơ̆ng tơring bơ̆ jang, Dak Lăk hlôi pơjing ‘nao 102 đảng bộ tơring, phương; đĭ đăng yưh liê̆u đang viên đei chih tơmơ̆t lơ̆m hơnih kmăi kmok vei lăng atŭm. Jang kiơ̆ ƀlep hla bơar tơchơ̆t ‘noh “hơmet pơ ‘lơ̆ng hơnih bơ̆ jang, pơm hơtŏk hop akŏm chi ƀô̆ ‘lơ̆ng hơ iă”, dêh char hlôi pơjing lơ nơ̆r pơtho tơbăt vă hơmet hơ ‘lơ̆ng trong pơgơ̆r hop akŏm păng atŏk tơ iung đang viên tơ̆ tơring atăih yăih. Ƀok Y Nhuân Byă, Kơ iĕng Kơdră chĕp pơgơ̆r Ban Tổ chức Tỉnh ủy Đắk Lắk, tơbăt:“Mă blŭng, hơnơ̆ng atŏk kơtang bơ̆ jang pơrô̆ tơbăt vă jang kiơ̆ kơjăp Tơdrong kơkăp bơ̆ jang Đảng; mă ƀar, pơtho tơbăt hơdăh hloh dơ̆ng tơ̆ tơring vă atŏk kơtang hop akŏm ‘lơ̆ng hơ iă; mă pêng, atŏk kơtang tơroi tơbăt kon pơlei oei sa ‘lơ̆ng, atok tơ iung đang viên tơring hơtăih yăih; păng mă puăn, rim sơnăm kăl dăr lăng hơlen trong pơgơ̆r hop akŏm kơ khul kơdră chĕp pơgơ̆r, rim chi ƀô̆ găh jang kiơ̆ Tơdrong pơkăp bơ̆ jang Đảng.”

Trong jang ou jei trŏ lăp hăm trong pơchoh ăn Pơjing hla bơar tơbăt hơdăh pơtôch jang kiơ̆ ‘noh “tơmơ̆t dơ̆ng tơdrong tơchơ̆t hơdăh găh tơdrong pơgơ̆r joăt joe hop akŏm chi ƀô̆, hơmet pơ ‘lơ̆ng tơdrong hop akŏm koă kơ lê̆, yom dih băl lơ̆m tơdrong chă tơgop nơ̆r hăm dih băl”. Tơ̆ Dak Lăk, hloh đơ̆ng rim ‘măng dăr lăng sơnăm 2024, 85% hơnih jang đảng tơring đei lăng jang keh đang tơdrong jang; mălei oei đei hloh 30 chi ƀô̆ pơgơ̆r hop akŏm ưh hơnơ̆ng, tơdrong pơma dơnuh lơ̆m hop akŏm tim mă ‘lơ̆ng hơ iă. Tơ̆ tơring, bơ̆ jang chĕp pơgơ̆r vei lăng đang viên oei jing tơdrong tơnap tap hloh. Ƀok Nguyễn Ngọc Thịnh - Bí thư Chi ƀô̆, koeng Kơphô̆ 6 Tân Lợi, phương Buôn Ma Thuột - tơbăt: Lăp đơ̆ng rŏng hơgrop tơring, lơ tơring, phương đei măt bơngai đang viên lơ, lơ̆m ou mă kăl găh đang viên sơnăm mơlôh năm jang sa tơ̆ tơring hơtăih roi năr roi lơ, pơm ăn tơdrong vei kơjăp hop akŏm joăt joe kơ chi ƀô̆ tơƀơ̆p tôch tơnap tap.“Chi ƀô̆ nhôn đei 30% đang viên sơnăm mơlôh năm jang sa tơ̆ hơtăih, tơdrong bơ̆ jang vei lăng tôch mơmat tat. Ĭnh apĭnh kăl lăng hơlen mă brĕ hloh dơ̆ng găh vei lăng đang viên tơring, ưh khan lăp lăng kơjăp găh măt bơngai đei lơ mă lei lăng kơjăp truh tơ̆ bơ̆ jang ‘lơ̆ng.”

          Tơdrong mă ‘nou jei lei lăi hăm trong chih tơmơ̆t lơ̆m hla bơar tơchơ̆t tơƀôh hơdăh: kăl “tơchĕng hơlen tơmơ̆t dơ̆ng tơdrong tơchơ̆t găh vei lăng đảng viên ưh kơ oei mĭnh dơnơ̆ng, đảng viên ưh kơ lơ̆m bơngai bơ̆ jang teh đak”. Kiơ̆ đơ̆ng Ban Tổ chức Tỉnh ủy Dak Lăk, tơ̆ lơ tơring hơtăih yăih, măt bơngai đang viên hơnơ̆ng ưh kơ vang năm hop akŏm đơ̆ng 15–20%. Mĭnh ƀar chi ƀô̆ lăp đei mĭnh ƀar ‘nu đang viên oei kơtă tơring kơna hop akŏm mă pơgơ̆r hơgrop. Tơ̆ hơnăp tơdrong ou, dêh char tŏk bŏk jang pơlong năng phân mêm “Vei lăng đảng viên ưh kơ oei sa mĭnh dơnơ̆ng”, pơjao ăn khul kơdră chĕp pơgơ̆r đảng tơring iŏk jang chih tơbăt lơ̆m yưh liê̆u păng vei kơjăp pơgơ̆r hop akŏm ăn đảng viên năm jang tơ̆ hơtăih.

Đơ̆ng trong chă tơchĕng hơlen, hla bơar chih tơbăt pơtôch bơ̆ jang kơ Trung ương hơlen hơdăh bơ̆ jang dăr lăng, lăng hơlen “hlôi đei atok kơtang mă lei oei tim mă ƀôh hơdăh, xek tơlang pơm glăi păng dăr lăng hơnơ̆ng”. Tơ̆ Dak Lăk, jăl jang 2021–2025, lơ̆m dêh char hlôi pơgơ̆r hloh 1.200 ‘măng dăr lăng, lăng hơlen păng hơmet pơ ‘lơ̆ng hloh 300 tơdrong pơm glăi, tơjur vă jê̆ 30% pơtêng hăm jăl hơdrol. 100% ‘nu kang ƀô̆ dăr lăng đei hŏk pơhrăm tơplih kơsô̆, roi năr roi pơjing đei “dăr lăng kiơ̆ yưh liê̆u, dăr lăng hơlen lơ̆m yưh liê̆u, tơgŭm ƀôh hrôih tơdrong pơm glăi, tang găn đơ̆ng hơlou dôm tơdrong vă pơm glăi. Tiến sĩ Phạm Thị Xuân Nga - Kơ iĕng Kơdră chĕp pơgơ̆r Hơnih sơdrai Viện Khoa học Tơpôl tơring Trung Bộ păng Tây Nguyên - akhan, vă jang kiơ̆ ƀlep trong tơlĕch ăn lơ̆m hla bơar chih tơbăt bơ̆ jang pơtruh ăn Hop akom tih XIV, kăl hơnơ̆ng pơm pơkeh trong bơ̆ jang dăr lăng ‘lơ̆ng păng tơpăt hloh:“Hloh đơ̆ng ƀôh yan ou tơdrong pơgơ̆r hop akŏm chi ƀô̆, nhôn ƀôh kăl atŏk kơtang bơ̆ jang tơpăt, hơtŏ hơnơ̆ng lơ̆m dăr lăng; hơmet pơ ‘lơ̆ng tơdrong yom dih băl lơ̆m lăng hơlen đang viên, adoi atŏk kơtang jang kiơ̆ kmăi kmŏk lơ̆m bơ̆ jang vei lăng păng chih akom tôm pơtôch jang kiơ̆ tơdrong Pơkăp bơ̆ jang Đảng.”

‘Ngoăih dăr lăng lơ̆m hơnih bơ̆ jang, tơdrong tơchơ̆t jei sơkơ̆t hơdăh hơnăp jang dăr lăng tơpôl kơ Mặt trận Tổ quốc Việt Nam păng rim hơnih khul bơ̆ jang chinh trĭ-tơpôl. Tơ̆ Dak Lăk, rim sơnăm Măt trân iung jang hơdoi bơ̆jang kơhrĕng ‘măng dăr lăng găh jang kiơ̆ trong bơ̆ jang hơtŏ hơnơ̆ng tơ̆ tơring, bơ̆ jang kang ƀô̆, xek tơlang dôm tơdrong tơkêng, tơbăt hơdăh găh kon jên bơ̆ jang, jơhngơ̆m đon bơ̆ jang păng tơdrong pơm jŭk yŭk hơlou kơ bơngai chĕp kơ̆l. Sơnăm 2024, pơ đĭ lơ̆m khul Măt trân hlôi iung jang hloh 250 ‘măng dăr lăng, chih pơtruh ăn 420 nơ̆r athei đei hơnih bơ̆ jang kơpal tơgoăt iŏk, tơblang hơdăh. Kiơ̆ đơ̆ng đảng viên sơnăm ‘lŏ kră Lê Hữu Chỉnh oei lơ̆m phương Buôn Ma Thuột ‘noh Mặt trận Tổ quốc dăr lăng jĭ trŏ lăp hloh. “Bơ̆ jang dăr lăng đơ̆ng Mặt trận tôch kơ ‘lơ̆ng, kơ yuơ tơdrong bơ̆ jang kơ măt trân ‘noh jĭ lơ̆m kon pơlei. Tơdrong trŏ lăp tơpăt ‘lơ̆ng vă đe lăng hơlen ‘noh jĭ Măt trân, kơ yuơ Măt trân ưh kơ gơh tơchơ̆t tơdrong yă kiơ lơ̆m khul kơdră chĕp pơgơ̆r tơring. Kiơ̆ kơ ĭnh ‘nou jĭ trŏ lăp hloh, ‘lơ̆ng hloh, pơm lơ liơ bơ̆n hơvơn đei Măt trân, ‘nou jĭ tôch trŏ lăp hăm tơdrong pơkăp nơ̆r Đảng jơhngơ̆m đon kon pơlei”

Đơ̆ng tơdrong yan ou tơ̆ Dak Lăk đei ƀôh, dôm tơdrong chih tơbăt lơ̆m Trong pơjing hla bơar tơbăt hơdăh Pơtôch bơ̆ jang 15 sơnăm jang kiơ̆ Tơdrong pơkăp bơ̆ jang Đảng tŏk bok đei tơring tơlĕch jang kiơ̆ ‘lơ̆ng hơ iă hăm trong bơ̆ jang hơdăh yan ou. Mă lei, vă rim tơdrong tơchơ̆t đei tơmơ̆t jang ‘lơ̆ng lơ̆m tơdrong hơrih sa, kăl hơnơ̆ng pơm pơkeh rim tơdrong tơchơ̆t dăr lăng, lăng hơlen ‘lơ̆ng hơnơ̆ng đơ̆ng chi ƀô̆ truh tơ̆ dêh char, adoi tơlĕch jang kiơ̆ ‘lơng hơnăp jang dăr lăng tơpôl đơ̆ng kon pơlei păng Mặt trận lơ̆m Tơdrong pơkăp bơ̆ jang hơmet ming. Mưh dăr lăng păng lăng hơlen đei jing tơdrong joăt kơdih hơmet pơ ‘lơ̆ng, Tơdrong pơkăp bơ̆ jang Đảng mă tơpă jing tơdrong pơkăp ‘lơ̆ng iung jang lơ̆m tơdrong bơ̆ jang chinh trĭ kơ Đảng.