Ƀok Anŭ đei kon pơlei lui pôk pơm kră pơlei đơ̆ng sơnăm 2002. Hăm gơh jang păng bưng ai đơ̆ng kơ dih, ƀok Anŭ hlôi pơm đei 1 ƀơ̆r đon, vang hơdai băl hơtŏk tơiung mŭk drăm, pơjing pơlei pơla pơdrŏng ‘lơ̆ng. Kơlih hăm trong jang hơiă, arih hơhâu, pơma sa gơh, ƀok Anŭ hlôi tơroi dôm trong jang, tơdrong tơgŭm đơ̆ng Đảng păng teh đak truh kon pơlei Bahnar, păng đei kon pơlei tôch tơgŭm. Ƀok Anŭ tơroi:

“Ĭnh jang kră pơlei kŭm đunh bơih đơ̆ng sơnăm 2002. Dang ei rim bơngai kŭm hlôh bơih, 1 ƀơ̆r đon, vang hơdai pơjing pơlei pơla. Tơdrong ‘mêm băl lơ̆m pơlei pơla kŭm đei vei kơjăp, mưh đei tơdrong pơam tơhil băl, dăh mă tơgar băl âu to... nhôn năm sek tơlang tơtom, kon pơlei ling lang răp mơ̆ng păng pơm kiơ̆.”

Hơdai hăm tơdrong jang ‘lơ̆ng hơnăp jang kơ bơngai vei lăng tơdrong pơlei, ƀok Anŭ kŭm jing bơngai jang sa hơgei tơ̆ tơring. Đơ̆ng hloh 2hek tar cheh phe, 1 hek tar chŭn na păng rong rơ mo, nhŭng, gơnang đơ̆ng pơnam, băt trong săy phŏng ăn kơ ‘long pơtăm, rim sơnăm đơ̆ng rŏng kơ jô̆ đĭ jên jang, ŭnh hnam sư iŏk đei dang 150 triệu hlak jên. Iŏk yua âu ưh tam mă gan lơ mă lei gơnang đơ̆ng băt trong ‘mơ ‘met, răt yua lăp kơ na sư hlôi man đei hnam kơjăp ‘lơ̆ng, răt tôm tơmam pơyua ăn jang sa păng oei sa rim năr.

Hơdai hăm ‘noh, ƀok Anŭ oei bơngơt truh tơgŭm hăm kon pơlei mưh tơƀơ̆p mơ mơtat. Ƀôh hơdăh nhen lơ̆m sơnăm 2020, lơ̆m pơlei đei dôm bơngai năm jang tơ̆ hơtăih ƀrŏk tơ̆ hnam đei ƀơm jĭ Covid-19, đĭ lơ̆m pơlei athei pơm kiơ̆ trong ăn oei hơdrô̆. Ƀok Anŭ đei tơgŭm asong bơ̆n phe, ‘nhot, ƀoh ngok sa ăn kon pơlei, hơdai hăm iŏk jang tơdrong tơgŭm 1,2 ŭnh hnam đei ăn oei hơdrô̆ akŏm vei lăng hnam oei, hiĕm bơ̆n kon tơrong lơ̆m dôm năr đei ăn oei hơdrô̆. Dôm tơdrong jang hơdăh ‘lơ̆ng âu pơm ăn kon pơlei roi ‘mêm kơ sư.

Ƀok Sing, Kơdră chĕp kơ̆l Anih vei lăng kon pơlei xăh G’Lar, apŭng Đoa, dêh char Gia Lai tơbăt: plei Tuơh Ktu, xăh G’lar, apŭng Đak Đoa dang ei đei hloh 230 ŭnh hnam kon pơlei, bơngai kon kông đei hloh 90%. Ƀar pêng sơnăm kơ âu, kon pơlei ưh khan lăp choh jang sa, vei rong kon tơrong đĕch mă oei pơ̆n tơmơ̆t jên jang mơdro sa, pơm kŏng nhân tơ̆ dôm hnam kơmăy. Pơlei dang ei đei 190 ŭnh hnam iŏk đơ̆ng 100 triệu hlak jên tơ̆ kơpal, lơ̆m noh, 40 - 50 ŭnh hnam iŏk đơ̆ng 300 triệu hlak jên tơ̆ kơpal. Dôm tơdrong jang hơdăh ‘lơ̆ng đơ̆ng ƀok Anŭ hlôi tơgop ăn tơdrong tơplih tơ̆ tơring. Dôm kơdră chĕp kơ̆l tơring chih iŏk, asong lơ ƀăng khen, hla ar pôk pơ ư...

“ Ƀok Anŭ ‘noh 1 ‘nu bơngai kră pơlei, đơ̆ng kon pơlei đei rơih iŏk sư, sư jang tôch kơ tơnăp, ling lang hơdrin tơgŭn kon pơlei lơ̆m pơlei. Mưh kon pơ lei tơƀơ̆p tơdrong mơmat tat, sư năm tơgŭm, pơlung. Ŭnh hnam sư jang sa đei ƀôh kơna sư đa tơchă truh, tơgŭm lơ bơngai đei tơdrong arih sa dơnuh hin, mơmat tat. Lơ̆m dôm sơnăm pơm kră pơlei, sư ling lang jang keh đang ‘lơ̆ng hơnăp jang hăm pơlei pơla, đei khŭl kơdră chĕp kơ̆l xăh, apŭng pơ ư.”

Hloh 20 sơnăm đei kon pơlei pôk pơm ăn kră pơlei ưh kơ jô̆ lơ̆m pơlei, ‘ngoăih kơ xăh đei ƀôh tơdrong tih iĕ ƀok Anŭ hơnơ̆ng đei măt hơdai hăm grŭp sek tơlang tơ̆ tơring. Ƀok pơma tơblang hơđăl, ƀlep tơdrong, tơgŭm ăn kon pơlei arih sa hơdai hiôk hian, 1 ƀơ̆r đon. Yua thoi noh, ƀok Anŭ ling lang đei kon pơlei Bahnar lui ‘mêm păng lăng ‘noh jĭ hơnih gơnang kơjăp tơ̆ tơring.