‘Năr (31/03), tơ̆ Anih jang kơ Khul kơdră teh đak, Thủ tướng Phạm Minh Chính pơjao tơdrong tơchơ̆t đơ̆ng Thủ tướng găh tơdrong jang kăn ƀô̆. Kiơ̆ kơ ‘nŏh, ƀok Bùi Thế Duy, Kơdră jang pơgia lơ̆m Khul kơdră chĕp kơ̆l Trung ương Đảng, Phŏ Kơdră Anih tơchĕng hơlen Khoa hŏk păng kơmăy kơmŏk Việt Nam pơm Kơdră Hnam trưng Đại học Quốc gia Hà Nội.

Pơjao tơdrong tơchơ̆t păng pôk hơpăh pơkao ăn ƀok Bùi Thế Duy, Thủ tướng Phạm Minh Chính pơma akhan: tơdrong Đảng, Teh đak lui pơjao ăn ƀok Phạm Thế Duy hơnăp jang tih pơm Kơdră Hnam trưng Đại học Quốc gia Hà Nội ‘nŏh jĭ tơdrong hơiă tih, athei jang mă tơnăp hăm Đại học Quốc gia Hà Nội lơ̆m chăl ‘nao.

Pơma mưh iŏk tơdrong jang, ƀok Bùi Thế Duy pơkăp vă hơnhăk đĭ đon rơgei, bơ̆ jang gơ̆h đơ̆ng kơdih, adrin dêh hlŏh dơ̆ng vă tưk tơiung đon jang tơnăp, vei kơjăp đon rơgei, jang tơnăp ‘lơ̆ng, kŭm hăm khul kơdră chĕp kơ̆l păng đĭ đăng kăn ƀô̆, thây kô pơtho mât 1 ƀơ̆r đon, tơplih ‘nao, bơ̆ jang pran kơtang, đei yoa, hơnhăk Đại học Quốc gia Hà Nội tŏk pran, tơgăl hăm đon lui păng hơmĕng đơ̆ng Đảng, teh đak, Khul kơdră teh đak păng Thủ tướng teh đak vang tơgop đei yoa ‘lơ̆ng ăn tơdrong tơiung pơjing păng vei lăng teh đak.