Kiơ̆ kơsô̆ chih jô̆ đơ̆ng Anih vei lăng pơtho pơhrăm dêh char Đắk Lắk, đơ̆ng rŏng kơ 'mi tih đak lơ̆p 183/243 hnam trưng tơ̆ dôm xăh găh Hơlĕch kơ dêh char Đắk Lắk athei tơgŭm 535.830 blăh hla ar hŏk. Lơ anih jang vang yak hơdoi, hơpăh dơ̆ng đĭ đăng kơsơ̆p hla ar hŏk âu ăn anih pơtho pơhrăm Đắk Lắk, hăm kơsô̆ jên tơgŭm dang 8,2 ti. Đơ̆ng rŏng kơ iŏk đei hla ar đơ̆ng đe tơgŭm, đơ̆ng 'năr 27/11 kơsơ̆p hla ar hlôi đei chơ tơ̆ dôm hnam trưng păng tơchĕng adrol gô đei ƀơk đang adrol kơ 'năr 4/12.

Ƀât 'mi tih đak lip tôch dêh âu ki, đơ̆ng 'năr 16 - 22/11, đak tih tŏk lơ̆p lơ xăh găh Hơlĕch dêh char Đắk Lắk, hoch lơ tơmam kon pơlei păng hla ar, tơmam hŏk pơhrăm kơ đe oh hŏk tro. Tơdrong Anih vei lăng pơtho pơhrăm Đắk Lắk oei hăt chơ hla ar hŏk năm tơ̆ dôm tơring đak lơ̆p, gô đei tơgŭm ăn sơnăm hŏk đei pơgơ̆r 'lơ̆ng dơ̆ng, atŭm hăm 'nŏh tơjur ƀiơ̆ tơdrong pơmat tat găh jên hu hăm rim hnam tơnŏ, đơ̆ng rŏng kơ hiong pơđĭ tơmam đơ̆ng 'mi tih đak lơ̆p.