Tơdrong tơchơ̆t đei tơmơ̆t yua đơ̆ng ‘năr 19/3. Pơma pơjao hơnăp jang, ƀok Lương Nguyễn Minh Triết, Bí thư Anih jang Đảng dêh char Đắk Lắk hơlen lăng ƀok Đỗ Hữu Huy jĭ kang ƀô̆ đei hlôh vao lơ, hlôi iŏk jang lơ kơchư̆k jang gĭt kăl lơ̆m tơdrong jang mŭk drăm păng vei lăng tơring.

Tơdrong ăn năm jang, klăih song jang ‘măng âu vă pơm lăp hăm ‘meh vă chĕp kơ̆l pơgơ̆r lơ̆m khei ‘năr dêh char athei tŏk hrĕnh, hơdrin jang đei tơdrong hơgăt jang tŏk 2 kơsô̆ hăm đon tơchĕng, trong jang ‘nao păng kơtang hloh. Iŏk hơnăp jang, ƀok Đỗ Hữu Huy tơƀôh đon hơdrin kŭm hăm khŭl kơdră chĕp kơ̆l pơjing khŭl jang mĭnh jơhngơ̆m đon, bơ̆jang khŏm đei, iŏk jơnei pơyua ăn kon pơlei păng anih mơdro sa pơm ‘long rek pơtŏ. Ƀok kŭm băt hơdăh dôm hơnăp jang tơm tơ̆ hơnăp kơnh.