Ƀlep lơ̆m jơ ‘năr Pơm lêh tih Noel sơnăm 2022, kơsơ̆ brei, năr 21/12, Bí thư Trung ương Đảng, Kơdră chĕp pơgơ̆r Dơnŏ anĭh  Trung ương MTTQ Việt Nam Đỗ Văn Chiến pơm tơm Khul bơ̆ jang kơ Trung ương, Dơnŏ anĭh Trung ương Mặt trận Tổ quốc Việt Nam hăm Kơdră chĕp pơgơ̆r dêh char Kon Tum hlôi năm ngôi, hmach chơt hơ iă Noel tơ̆ Hnam oei păng bơ̆ jang đe Ƀok soi khul Lui khop Kon Tum.

Tang măt ăn kơdră chĕp pơgơ̆r Đảng, Teh đak, Kơdră chĕp pơgơ̆r Trung ương Mặt trận Tổ quốc Việt Nam Đỗ Văn Chiến pơtrŭh nơ̆r hmach chơt hơ iă Noel ăn Ƀok soi tơm pơgơ̆r Tơring Khop Kon Tum Nguyễn Hùng Vị, rim ƀok soi, yă giĕng păng kon pơlei kon khop sơng mĭnh pơyan Noel chơt hơ iă ‘nă hal, hơnŭk hơnoa, jang sa iŏk đei jơnei păng sơng iŏk đei lơ tơdrong plang ăn đơ̆ng Bă yang. Pơma dơnuh hăm Ƀok soi tơm vei lăng Tơring khop Kon Tum Nguyễn Hùng Vị, tang măt ăn rim ƀok soi păng kon pơlei kon khop, ƀok Đỗ Văn Chiến pơma hơdăh, mă đơ̆ng iŏk đei lơ tơdrong jơnei tih tên găh atŏk tơ iung mŭk drăm-tơpôl, tơdrong erĭh sa hơnŭk hơnoa mă lei sơnăm 2023, lơ̆m tơdrong atŭm kơ apŭng plĕnh teh adoi kơchăng hơdrol ‘nŏh teh đak bơ̆n gô đei tơdrong tơnap tap, tơdrong mă ‘noh kăl pơkoĕl đei mĭnh jơhngơ̆m đon vang kơrŭn iung jang kơ pơđĭ Đảng, pơđĭ khul ƀô̆ đô̆i păng pơđĭ kon pơlei.