Pơgê năr 2/10, Tĭnh uy Quảng Ngãi pơgơ̆r Hop akŏm tơbang tơchơ̆t đơ̆ng Anih tơm Chĭnh trĭ gah tơdrong jang kang ƀô̆. Tơ̆ hop akŏm, ƀok Hoàng Đăng Quang, Phŏ Kơdră Anih Pơgơ̆r jang ăn Trung ương tơbang tơchơ̆t đơ̆ng Anih tơm Chinh trĭ gah tơdrong jang kang ƀô̆. Kiơ̆ kơ noh, Anih tơm Chinh trĭ tơchơ̆t pôk ƀok Hồ Văn Niên – Thư̆ trương Anih Tơm jang gah Kon pơlei kon kông păng dôm Tơdrong Khop, vang jang lơ̆m Ƀan châ̆p hanh, Anih jang Tĭnh uy Quảng Ngãi jăl jang 2025 - 2030 păng iŏk jang kơchư̆k Ƀĭ thư Tĭnh uy Quảng Ngãi jăl jang 2025-2030, pơtăl kơ yă Bùi Thị Quỳnh Vân đei Anih tơm Chinh trĭ pôk jang Phŏ kơdră Anih pơgơ̆r jang Trung ương.

Ƀok Hồ Văn Niên rơneh năr 15/10/1975; bơngai Bahnar; pơlei pơla tơm tơ̆ dêh char Gia Lai; hŏk đang Kư nhơ̆n Luơ̆t, Kư nhơ̆n Lĭ luâ̆n Chinh trĭ. Pơma ah iŏk sơnong jang, ƀok Hồ Văn Niên, Ƀĭ thư 'nao kơ Tĭnh uy Quảng Ngãi akhan, tơdrong mă Anih tơm Chinh trĭ pôk jang Ƀĭ thư Tĭnh uy Quảng Ngãi jĭ minh tơdrong ư ang tih tên hăm kơdih po ƀok. Ƀok Hồ Văn Niên sơkơ̆t hơnơ̆ng vei sơđơ̆ng đon bơnôh chinh trĭ, tơnăp 'lơ̆ng; hơnơ̆ng yuk hơlou lơ̆m anih jang, atŭm hăm Anih jang kơpal, Ƀan châ̆p hanh Đảng ƀô̆ dêh char akŏm đei tơdrong tơguăt tơguăl, pơm jang đei jơnei dôm Tơchơ̆t mă Hop akŏm Đảng ƀô̆ dêh char jăl jang 2025-2030 tơchơ̆t tơlĕch.