VOV4.Bahnar - ‘Năr 21/9, Hop akŏm ƀok Kơ dră ASEAN găh tang găn tơ drong yoch klĕch tơ̆ tĕh đak nai ‘măng mă 16 hăm hơ năn “"ASEAN bơ̆ jang vang tơ jră hăm dôm tơ drong nol" păng dôm hop akŏm đei ƀơm truh pơ gơ̆r kiơ̆ trong trư̆k tuyê̆n. Đại tướng Tô Lâm, Kơ dră jang lơ̆m Anih tơm Chinh trĭ, Kơ dră tơm vei lăng Công an Việt Nam vang akŏm. 

Ƀok Kơ dră Tô Lâm vang Hop akŏm ƀok Kơ dră ASEAN găh tang găn tơ drong yoch klĕch tơ̆ tĕh đak nai ‘măng mă 16

Pơ ma lơ̆m jơ hôp atŭm, ƀok Kơ dră Tô Lâm ăn tơ băt kiơ̆ đơ̆ng pơ jing “đon lui chinh trĭ” lơ̆m tơ drong tơ blăh tang găn tơ drong yoch klĕch tơ̆ tĕh đak nai păng pơ jing đon lui băl, dôm anih jang luơ̆t kơ ASEAN athei hơ nơ̆ng hơ met kơ jăp păng tưk hơ tŏk tơ drong đei yoa đơ̆ng dôm tơ drong jang, trong jang hơ doi găh tang găn tơ drong yoch klĕch tơ̆ tĕh đak nai lơ̆m dôm trong jang hơ doi lơ pang đơ̆ng ASEAN hrei ‘nâu.

Atŭm hăm ‘nŏh hơ tŏk tơ drong roi tơ băt ăn băl dôm tơ drong kăl vă tơ jră hăm dôm khul pơm yoch klĕch tơ̆ tĕh đak nai lơ̆m tơ ring, mă loi jĭ hăm dôm tơ drong yoch oei ƀôh roi tŏk nhen tơ drong yoch ma túy, tơ drong yoch lơ̆m mang păng tơ drong yoch iŏk yoa kơ măy kơ mŏk ‘nao.

Dơ̆ng: Tơ blơ̆