Pơma tơ̆ jơ pơm lêh, ƀok Kơdră teh đak Nguyễn Xuân Phúc ƀlŏk hơdơ̆r păng tơƀôh jơhngơ̆m băt bơnê tôch kơ dêh truh ƀok Kơdră Hồ Chí Minh pran kơtang, tơƀôh jơhngơ̆m băt bơnê gĭt kăl păng chih răk kŏng jang tih tên đơ̆ng đe yŏng lĭnh, kang ƀô̆, khŭl linh păng kon pơlei hlôi nuih mơng plang hơkâu yua kơ tơdrong jang iung tơblăh iŏk rơngei hơdrĕch hơdrŭng.

Ƀok kơdră teh đak Nguyễn Xuân Phúc tơroi rơđăh, tơdrong et hơtŏk Hơnih ƀlŏk hơdơ̆r Hòn Tàu – Đèo Le đei tơdrong ‘lơ̆ng tôch kơ tih ƀơ̆t khei ‘năr âu lĭnh păng kon pơlei lơ̆m teh đak tŏk bŏk lăng truh tơbăt 78 sơnăm Năr pơjing Khŭl linh kon pơlei Việt Nam (22/12) păng 33 sơnăm Năr đĭ đăng kon pơlei vei lăng teh đak (22/12). Kiơ̆ đơ̆ng noh, 1 ‘măng dơ̆ng pơma hơdăh tơdrong iung tơblăh vei lăng teh đak đơ̆ng kon pơlei Việt Nam ‘noh jĭ tơdrong iung tơblăh trŏ ƀlep, yua kơ tơdrong rơngei hiôk hian ăn kon pơlei.