Khul pơjing kiơ̆ đơ̆ng tơmât hơdai Khul chih hla ar tơroi 3 dêh char Lâm Đồng, Bình Thuận păng Đắk Nông, hăm hlŏh 600 ‘nu bơngai. Khul kơdră chĕp kơ̆l ‘nao đei 27 ‘nu bơngai. Hop akŏm pôk ƀok Lê Huy Toàn, Kơdră jang lơ̆m Anih chĕp kơ̆l đảng dêh char, Kơdră vei lăng Ƀăo păng Radio – pơdăh um rup Lâm Đồng pơm kơdră vei lăng Khul.

Pơma ƀât iung kơchư̆k jang, ƀok Lê Huy Toàn pơma hơdăh vă kŭm hăm Khul kơdră chĕp kơ̆l pơgơ̆r ăn khul bơ̆ jang sơđơ̆ng ‘lơ̆ng, tưk tơiung hơnăp jang đơ̆ng bơngai chih hla ar tơroi lơ̆m tơdrong jang chinh trĭ, đon tơchĕng, tơgop ‘lơ̆ng ăn tơdrong jang tŏk kơ dêh char.