Tơ̆ hop akom, bơngai tăh hla akŏm pơma tơbăt lơ̆m dôm tơdrong oei sa jang sa kơ kon pơlei, trong nơnăm păng jang sa. Lơ̆m ou, kăl hrôih hơmet pơ ‘lơ̆ng tơdrong roi năr roi kơnê̆, đak lơ̆p tơ̆ jăl trong Glung 1 yak hloh phương Bình Kiến; tơmơ̆t jên jang, hơmet ming hnam hop akŏm pơlei pơla păng hơnih ming man veh ver ‘mi kial hơbŭt hơbông pơrăm tơ̆ rim pơlei pơla, tơring thŭng. Bơgai tăh hla jei pơma truh găh tơdrong lăng tông nông gia dôm kang ƀô̆ tơring pơlei pơla păng bơngai kră. Pơma pơtôch jơ tơƀơ̆p pơma dơnuh hăm bơngai tăh hla, ƀok Nguyễn Thanh Nghị tơgoăt iŏk nơ̆r tơgop, athei đơ̆ng bơngai tăh hla; đơ̆ng noh, athei kơdră chĕp pơgơ̆r tơring, rim hơnih bơ̆ jang dêh char Đắk Lắk hơlen kơjăp păng xek tơlang keh đang dôm tơdrong mă hơnih gơh jang. Dôm tơdrong mă ưh kơ lơ̆p pơjao jang kăl chih akom, pơtruh ăn hơnih kơpal lăng hơlen. Khul kơdră tang măt Kuô̆k hô̆i dêh char đei hơnăp jang dăr lăng hơlen dôm tơdrong jang xek tơlang, hơmet pơ ‘lơ̆ng dôm nơ̆r tơgop trŏ lăp đơ̆ng kon pơlei đei hơmet pơ ‘lơ̆ng.