Pơma ah jơ tơƀơ̆p, Tổng Bí thư, Kơdră teh đak bơ̆n Tô Lâm chơt hơ-iă hăm tơdrong tơƀơ̆p rim bơngai jang mŭk drăm hơgei, tang măt ăn bơngai jang mŭk drăm Việt Nam. Tang măt ăn kơdră Đảng, Teh đak, Tổng Bí thư, Kơdră teh đak bơ̆n pơtruh nơ̆r hăm rim bơngai jang mŭk drăm lơ̆m teh đak bơ̆n, tơ̆ teh đak đe păng rim hơnih asong jang đơ̆ng teh đak tŏk bŏk oei pơm jang hăm Việt Nam nơ̆r pơma dơnuh hơ-iă 'lơ̆ng rŏ hloh.

Tổng Bí thư, Kơdră teh đak bơ̆n sơkơ̆t hơdah, Đảng, teh đak pôk bơnê kơ tơdrong plang, vei lăng tơdrong pơyua trŏ ƀlep, pơm trong hiôk vă bơngai jang mŭk drăm akŏm tơdrong hơgei, pơm pơdrŏng tơgăl trŏ ƀlep. Tổng Bí thư, Kơdră teh đak bơ̆n hơpơi 'meh rim bơngai jang mŭk drăm akŏm đon bơnôh tih sơ̆n, vă pơjing hơnih jang mŭk drăm, hơnăn tơmam drăm 'lơ̆ng, lui ngeh păng hơgei, hơnhăk tơdrong pơ-ư pơ-ang ăn Việt Nam. Truh sơnăm 2045, ah mă teh đak đei jơnei rơngei hiôk hian tôm minh hơnglŏ sơnăm, bơ̆n hơpơi 'meh pơ-ư pơ-ang kơ minh Việt Nam hơtŏk tơ-iung, hăm dôm hơnih jang mŭk drăm kơjăp kơtang.